Teknologjitë turke të mbrojtjes mund ta rrisin ndjeshëm efektivitetin operacional të ushtrisë së Malit dhe të ndihmojnë në përballimin e mungesës së personelit ushtarak në vend, deklaroi sekretari i përhershëm i Këshillit Kombëtar të Sigurisë së Malit.

Gjeneralmajori në pension Yamoussa Camara, duke folur në margjinat e panairit BAMEX 2026 në kryeqytetin e Malit, Bamako, tha për Anadolu se sigurimi i territorit të gjerë të vendit, me një sipërfaqe prej 1,24 milion kilometrash katrorë kërkon burime që ushtria e vendit, e kufizuar nga buxheti, nuk mund t’i sigurojë aktualisht.

Camara tha se integrimi i zgjidhjeve të avancuara teknologjike në forcat e armatosura të vendit, veçanërisht i teknologjive turke të mbrojtjes, do ta rriste efektivitetin e tyre operacional.

Ai veçoi mjetet ajrore pa pilot (dronët) si mjete të rëndësishme ushtarake për përballimin e sfidave të sigurisë në Mali, ndërsa theksoi se ekspertiza dhe përvoja e gjerë e Türkiyes në fushën e mbrojtjes e bëjnë të domosdoshëm zgjerimin e bashkëpunimit ushtarak dypalësh.

Përpjekjet e vazhdueshme për bashkëpunim mes Aleancës së Shteteve të Sahelit (AES), e përbërë nga Mali, Burkina Faso dhe Nigeri, nuk kanë qenë të mjaftueshme për t'i përmbushur nevojat e tyre të sigurisë, duke e pasur parasysh shtrirjen e gjerë të rajonit Liptako-Gourma, ku të tria vendet ndajnë një kufi të përbashkët, si dhe vështirësitë për ta garantuar sigurinë pa teknologji.

Ai shtoi se vendet anëtare të AES-së duhet t'i mobilizojnë më tej burimet e përbashkëta dhe t'i forcojnë strukturat e tyre të sigurisë përmes një bashkëpunimi më të thellë me Türkiyen.