Dy persona humbën jetën të hënën pasi një avion i tipit Cessna u rrëzua pak pas ngritjes nga Aeroporti Kombëtar i Pachucas, në shtetin Hidalgo, në Meksikën qendrore, njoftoi Agjencia Federale e Aviacionit Civil e Meksikës (AFAC).

Sipas një postimi të agjencisë në X, avioni Cessna 210, i operuar nga kompania Grupo Aeroespacial Avspace, ishte nisur në orën 09:30 sipas kohës lokale, me destinacion Aeroportin Ndërkombëtar të Cuernavacas, në shtetin Morelos.

Avioni u rrëzua vetëm një minutë pas ngritjes, gjatë fazës fillestare të ngjitjes, kur ndodhej rreth 500 metra nga fillimi i pistës 21, bëri të ditur agjencia.

Sipas informacioneve paraprake, avioni ra në rrugën Tezontle, në lagjen Venta Prieta të Pachucas, kryeqytetit të shtetit Hidalgo.

Aksidenti ndodhi jashtë perimetrit të aeroportit, në një zonë urbane pranë pistës, sipas raportit paraprak të autoriteteve të aviacionit.

Të dy personat që ndodheshin në bord humbën jetën. AFAC-ja nuk publikoi menjëherë identitetet e tyre dhe as detaje të tjera mbi rolet që kishin në avion.

Pas aksidentit, personeli i autoriteteve të aeroportit të Pachucas mbërriti në vendngjarje për të kryer procedurat përkatëse dhe për të koordinuar ndërhyrjen e institucioneve përgjegjëse.

Agjencia njoftoi gjithashtu nisjen e një hetimi administrativ për të përcaktuar rrethanat e aksidentit.

AFAC-ja nuk dha informacione mbi ndonjë defekt të mundshëm teknik, kushtet meteorologjike apo faktorë të tjerë që mund të kenë ndikuar në rrëzimin e avionit.

Po ashtu, autoritetet nuk bënë të ditur nëse kishte persona të plagosur në tokë apo nëse ishin dëmtuar ndërtesa ose automjete nga rënia e avionit në rrugë.

Deri më tani, nuk janë publikuar përfundime paraprake mbi shkakun e aksidentit.

Cessna 210 është një avion me një motor, që përdoret për fluturime private dhe operacione të aviacionit të përgjithshëm.