Xhamia Al-Aksa në Jeruzalemin (Kudsin) Lindor të pushtuar u rihap të enjten për besimtarët myslimanë, pas një mbylljeje 40-ditore të vendosur nga Izraeli, në mes të veprimeve të përbashkëta ushtarake ShBA-Izrael kundër Iranit.

Sipas një gazetari të Anadolu Agency në terren, xhamia, e vendosur në Qytetin e Vjetër, u hap në agim, duke u mundësuar qindra myslimanëve palestinezë të hyjnë në kompleksin Al-Haram al-Sharif.

Me hapjen e portave në kohën e ezanit të sabahut, një numër i madh besimtarësh u drejtuan drejt vendit të shenjtë; shumë prej tyre u panë duke shpërthyer në lot dhe duke bërë sexhde falënderimi në oborret e xhamisë.

Qindra myslimanë u rreshtuan për namazin e sabahut, duke shënuar faljen e parë me xhemat në këtë vend që nga mbyllja e tij.

Ministri izraelit i Sigurisë Kombëtare, Itamar Ben-Gvir, hyri në kompleks më 6 prill, ndërkohë që ai mbetej i mbyllur.

Izraeli e mbylli plotësisht qasjen në Xhaminë Al-Aksa më 28 shkurt, në të njëjtën kohë me sulmet ndaj Iranit, duke lejuar vetëm stafin e xhamisë dhe zyrtarët e Vakëfit Islamik të Jeruzalemit të falen në vend, ndërsa palestinezët e tjerë u detyruan të falen në xhami më të vogla nëpër qytet.

Autoritetet gjithashtu ndaluan faljen e Fitër Bajramit këtë vit në Al-Aksa, duke shënuar herën e parë që një kufizim i tillë vendoset që nga pushtimi i Jeruzalemit Lindor nga Izraeli në vitin 1967.

Gjatë së njëjtës periudhë, autoritetet izraelite mbyllën edhe Kishën e Varrit të Shenjtë, një nga vendet më të shenjta të krishterimit në Jeruzalem.

Qeveria izraelite kishte zgjatur gjendjen e jashtëzakonshme deri në mes të prillit, por nuk sqaroi nëse xhamia do të mbetej e mbyllur gjatë gjithë kësaj periudhe.