Presidenti i ShBA-së, Donald Trump, kërcënoi sot se do t’i dyfishojë “menjëherë” tarifat ndaj Meksikës, nëse autoritetet meksikane nuk ndalojnë karvanët e mëdhenj të migrantëve, të cilët, sipas pretendimeve të tij, po përparojnë drejt kufirit jugor të ShBA-së.

“Meksika duhet t’i ndalojë ata, tani, dhe nëse nuk e bën këtë, tarifat ndaj Meksikës do të dyfishohen menjëherë”, shkroi Trump në platformën e tij Truth Social, duke shtuar: “Nuk do të ketë asnjë tolerim!”.

Duke e lidhur pretendimin për shtimin e migrantëve në kufi me zgjedhjet e javës së kaluar për Kongresin, në të cilat Demokratët siguruan shumicën në të dyja dhomat dhe fituan disa poste të rëndësishme të guvernatorëve në shtete, Trump pretendoi se një “pushtim” i ShBA-së po rifillon për shkak të “humbjes së perceptuar nga Republikanët”.

Ai pretendoi se “karvanë të mëdhenj” po organizohen dhe po nisin një “marshim të paligjshëm përmes Meksikës”, duke thënë se vende të huaja po dërgojnë drejt ShBA-së persona të padëshiruar, të cilët, sipas tij, “nuk do të pranohen”.

Trump tha se zyrtarët meksikanë, Policia Kufitare e ShBA-së dhe Agjencia e Imigracionit dhe Doganave e ShBA-së (ICE), institucioni federal përgjegjës për zbatimin e ligjeve të imigracionit dhe dëbimet, janë njoftuar të gjithë për paralajmërimin e tij.

Ai ua drejtoi paralajmërimin drejtuesve të Teksasit, duke iu referuar guvernatores së zgjedhur demokrate të shtetit, Gina Hinojosa, e cila mposhti guvernatorin republikan në detyrë, Greg Abbott. Qeveria meksikane nuk ka reaguar ende lidhur me kërcënimin e Trumpit për tarifat apo pretendimet e tij për fluks migrantësh.