Türkiye nënshkroi sot 10 marrëveshje me vlerë prej 5,1 miliardë dollarësh me katër banka shumëpalëshe zhvillimore, në kuadër të Samitit për klimën COP31 në Antalya, njoftoi ministri i Financave, Mehmet Şimşek.
Bankat përfshijnë Bankën Aziatike për Zhvillim (ADB), Bankën Aziatike të Investimeve në Infrastrukturë (AIIB), Bankën Botërore dhe Bankën Islamike për Zhvillim.
Duke folur në ceremoninë e përbashkët të nënshkrimit, Şimşek tha se financimi do të ndihmojë në ndërtimin e një ekonomie më të gjelbër dhe më rezistente, përmes projekteve që mbështesin punësimin, modernizimin industrial dhe tranzicionin e gjelbër dhe digjital.
Që nga viti 2023, Türkiye ka siguruar rreth 50 miliardë dollarë financime të jashtme nga partnerët zhvillimorë, tha ai. Këto fonde kanë mbështetur rindërtimin pas tërmeteve, hekurudhat, uljen e emetimeve të karbonit, energjinë e rinovueshme, spitalet rezistente ndaj fatkeqësive, eksportuesit dhe bizneset e vogla.
Presidenti i ADB-së, Masato Kanda, prezantoi një marrëveshje në vlerë prej 620 milionë eurosh (687 milionë dollarë), që synon ndërtimin e spitaleve rezistente ndaj fatkeqësive, forcimin e shërbimeve shëndetësore dhe trajnimin e mjekëve.
Një shumë tjetër prej 500 milionë dollarësh do të sigurohet përmes "VakıfBank" për të zgjeruar financimin afatgjatë për bizneset e vogla, veçanërisht në provincat më pak të zhvilluara dhe ato të prekura nga tërmetet si dhe për sipërmarrëset gra.
Presidentja e AIIB-së, Zou Jiayi njoftoi financim prej 1,9 miliardë dollarësh, përfshirë 1,6 miliardë dollarë për programin e përshpejtimit të veprimeve klimatike të Türkiye dhe financime shtesë.
Presidenti i Grupit të Bankës Botërore, Ajay Banga tha se tri marrëveshje me vlerë të përgjithshme prej 1,5 miliardë dollarësh do të mbështesin qytetet, bujqësinë dhe industrinë, pa përfshirë investimet shtesë private që institucioni synon të mobilizojë.
Ai tha se portofoli i Grupit të Bankës Botërore në Türkiye ka arritur në 32 miliardë dollarë, duke e bërë vendin një nga përfituesit më të mëdhenj të financimit të tij në nivel global. Banga vuri në dukje transformimin ekonomik të Türkiyes gjatë një partneriteti që zgjat prej më shumë se 75 vjetësh.
