Kompania turke e mbrojtjes “Baykar” prezantoi dronët e saj luftarakë autonomë të gjeneratës së re, të zhvilluar në vend, gjatë një demonstrimi në tufë përpara debutimit publik të tyre në Panairin Ndërkombëtar të Industrisë së Mbrojtjes, Aviacionit dhe Hapësirës (SAHA Expo 2026), që do të mbahet muajin e ardhshëm në Stamboll.

Droni kamikaz “K2” (mjet ajror pa pilot) dhe municioni i lëvizshëm “Sivrisinek” janë shfaqur duke operuar në tufa shumë të koordinuara dhe të mbështetura nga inteligjenca artificiale, gjatë një testi të fundit në terren, në Qendrën e Testimit të kompanisë në Keshan.

Ngjarja nisi me pesë dronë kamikaz “K2” që u ngritën dhe fluturuan në formacione komplekse, të cilëve së shpejti iu bashkua një tufë prej dhjetë municionesh të lëvizshme “Sivrisinek”.

“Bayraktar TB2”, “TB3” dhe “Akinci”, dronët luftarakë më të mëdhenj të kompanisë “Baykar”, e shoqëruan dhe regjistruan operacionin nga ajri në të njëjtën kohë.

Dronët realizuan me sukses pozicionimin, navigimin dhe shënjimin plotësisht të pavarur nga Sistemet Globale të Navigimit Satelitor (GNSS), duke përdorur softuer të avancuar navigimi vizual të mbështetur nga inteligjenca artificiale.

Softueri i inteligjencës artificiale i lejon tufës të kryejë zbulime dhe goditje autonome të objektivave edhe kur sinjalet GPS janë të bllokuara ose të padisponueshme.

Municioni i lëvizshëm “Sivrisinek” përfaqëson një hap përpara në thellësinë operacionale, me një rreze goditjeje mbi 1.000 kilometra.

Falë inteligjencës artificiale, ky municion mund të ruajë komunikim të vazhdueshëm brenda tufës, duke i mundësuar asaj të ndajë menjëherë të dhënat e objektivave mes njësive për të koordinuar goditje të njëkohshme.

Tufa e “Sivrisinek” realizoi me sukses zhytje të koordinuara mbi koordinatat e përcaktuara gjatë testit, pasuar nga manovrat e zhytjes me shpejtësi të lartë të dronëve kamikaz “K2”.

Prezantimi nga kompania “Baykar” i këtyre platformave autonome të gjeneratës së re forcoi më tej pozicionin e saj në tregun global të mbrojtjes.

Gjiganti turk i mbrojtjes i financoi kërkimet e tij plotësisht me burimet e veta dhe ruajti statusin si eksportuesi më i madh në botë i mjeteve fluturuese me telekomandim në vitin 2025, duke vendosur një rekord të ri të kompanisë me një volum eksporti prej 2,2 miliardë dollarësh, sipas raportit të publikuar nga kompania të premten.

Kompania “Baykar” gjeneroi 90 për qind të të ardhurave të saj nga shitjet globale, pasi siguroi marrëveshje eksporti me rreth 38 vende për flotën e saj të dronëve luftarakë.