Një cisternë u godit nga një predhë e paidentifikuar në brigjet e Omanit të martën, njoftoi Qendra e Operacioneve të Tregtisë Detare të Mbretërisë së Bashkuar (UKMTO).
Kapiteni i anijes raportoi se cisterna u godit në orën 13:38 GMT, rreth 19 milje detare në verilindje të Limës, në Oman, sipas një njoftimi të lëshuar nga agjencia detare.
UKMTO-ja tha se ekuipazhi është i sigurt dhe se nuk është raportuar ndonjë dëmtim mjedisor.
Kapiteni do të “vlerësojë dëmet me dritën e parë të ditës”, shtoi agjencia.
Në njoftim nuk u identifikua cisterna dhe as nuk u specifikua se kush ishte përgjegjës për incidentin.
UKMTO-ja i këshilloi anijet që operojnë në zonë të lundrojnë me kujdes dhe të raportojnë çdo aktivitet të dyshimtë.
Ndërkohë, “ADNOC Logistics & Services” njoftoi se njëra prej anijeve të saj pësoi dëme nga një sulm në ujërat territoriale të Emirateve të Bashkuara Arabe, në Gjirin Persik, të martën pasdite.
