Nafta Brent ra më shumë se 3 për qind drejt nivelit prej 100 dollarësh për fuçi, duke shënuar rënie për të tretën seancë radhazi, ndërsa tregtarët vlerësuan rezultatet e zgjedhjeve të mesmandatit në SHBA dhe përpjekjet diplomatike për t’i dhënë fund luftës me Iranin, transmeton Anadolu.
Standardi ndërkombëtar i naftës tregtohej me 100,30 dollarë për fuçi në orën 14:25 GMT, me rënie prej 3,30 dollarësh ose 3,2 për qind, krahasuar me çmimin e mbylljes së të martës prej 103,60 dollarësh.
Demokratët fituan kontrollin e Dhomës së Përfaqësuesve dhe Senatit në zgjedhjet e mesmandatit të së martës në SHBA, duke siguruar shumicën në të dy dhomat e Kongresit.
Ata fituan vende në Senat të mbajtura më parë nga Republikanët në Teksas, Kansas, Karolinën e Jugut, Karolinën e Veriut dhe Ohajo.
Rezultatet e zgjedhjeve e bëjnë presidentin Donald Trump të përballet me shumicën demokrate në të dy dhomat, kur Kongresi i ri të mblidhet në muajin janar.
Ndërkohë, zëdhënësi i Ministrisë së Punëve të Jashtme të Katarit, Majed al-Ansari, dje deklaroi se Washingtoni dhe Teherani po shqyrtojnë propozimet e paraqitura nga ndërmjetësit që synojnë t’i japin fund konfliktit.
Të hënën, al-Ansari njoftoi se një delegacion nga Katari u takua me zyrtarë iranianë në Teheran për rreth tre orë për të diskutuar propozimet.
Al-Ansari tha se ndërmjetësit vazhdojnë të mbajnë kontakte me të dyja palët, por paralajmëroi se është ende herët për të raportuar ndonjë përparim diplomatik.
Ai gjithashtu dënoi shënjestrimin e anijes transportuese të gazit të Katarit, Al Mayeda, duke paralajmëruar se sulmet ndaj anijeve në Gjirin Persik kërcënojnë sigurinë rajonale dhe negociatat në vazhdim.
