Најмалку единаесет лица загинале во сообраќајна несреќа во која учествувале десетици возила од двата правци на автопат во источна Бугарија во вторник, изјави премиерот Румен Радев, додека Министерството за внатрешни работи соопшти дека 50 лица се повредени.
Полицијата, пожарникарите и службите за итни случаи брзо се упатија кон местото на настанот на патот што го поврзува главниот град Софија со источниот град Бургас. Фотографиите објавени од локалните медиуми покажаа автомобили и камиони натрупани на шест сообраќајни ленти, многу од нив згмечени, превртени или офрлени настрана.
Педесет од повредените се однесени во болница, според Министерството за внатрешни работи.
„Сè се случи многу брзо, видливоста низ маглата сигурно не беше поголема од 50 метри. Многу, многу луѓе загинаа тука; еден човек почина веднаш зад мене. Имаше уште четири други зад моето возило - камиони - не знам како излегов или што се случи, но на крајот, фала му на Бога, преживеав“, рече сведок на несреќата.
Радев го опиша инцидентот како „трагедија“ во изјавата издадена за време на посетата на Бугарија од страна на претседателката на Европската комисија, Урсула фон дер Лајен. Тој рече дека активирал авиони за евакуација на повредените и дека има намера да го посети местото на несреќата.
„Досегашниот биланс е 11 мртви и 48 повредени. Бидејќи концентрацијата на повредените е во болниците во Сливен и Јамбол, наредив, два воени авиони „Спартан“ во моментов да бидат прераспоредени од Бургас на аеродромот ‘Безмер’ во Јамбол. Остануваме целосно подготвени да ги евакуираме повредените од Сливен, Јамбол и Бургас во болниците во Софија“, рече Радев.
Фон дер Лајен рече дека ќе ја заврши својата посета порано.
„Сакам да изразам најдлабоко сочувство и да им оддам почит на спасувачките екипи“, рече фон дер Лајен.
Во разговор со новинарите на местото на настанот, висок функционер на Министерството за внатрешни работи, Љубомир Николов, рече дека маглата веројатно е причина за несреќата, која започна со судир меѓу автобус и камион на страната од автопатот која води кон Бургас.
Главниот инспектор на регионалната полиција, Тодор Мишинев, за телевизијата Нова изјави дека некои луѓе сè уште се заробени во своите автомобили.
„Спасувачките операции се моментално приоритет.“ Откако ќе бидат завршени, ќе се спроведат процедурални и истражни дејствија, рече тој.
Информациите, што претходно ги објави бугарскиот национален сервис, велат дека во верижната сообраќајна несреќа учествувале вкупно 86 возила-63 на автопатот во правец кон Буграс и 23 во другиот правец.
Во меѓувреме, автопатот „Тракија“ е затворен за сообраќај во двата правци и тој е пренасочен по обиколните патишта. На возачите што денеска патуваат во овој дел од Бугарија, има се препорачува да бидат особено внимателни.
