Чешкиот премиер Андреј Бабиш денеска во Белград изјави дека Западен Балкан треба да биде дел од Шенген зоната и дека европскиот континент треба да биде „заштитен“ од нелегалната миграција, а воедно нагласи дека Србија ја има поддршката на Прага за членство во Европската Унија.

Зборувајќи по средбата со српскиот претседател Александар Вучиќ, Бабиш ја опиша Србија како долгогодишен пријател и партнер на Чешка, нагласувајќи дека таа игра важна улога во зачувувањето на стабилноста на Европа, особено во време кога, како што рече, „повеќе се зборува за војна отколку за мир“.

Зборувајќи за европската интеграција на регионот, Бабиш рече дека не разбира зошто Србија сè уште не е дел од Шенген зоната, додавајќи дека Европската Унија треба поактивно да работи на нејзиното проширување кон Западен Балкан.

„Не разбирам зошто Србија не е во Шенген. Европската Унија треба да инсистира на постепено вклучување на Србија, откако ќе ги исполни сите услови“, рече тој.

Тој нагласи дека Србија, како и другите земји во регионот, треба да стане дел од европските структури штом ги исполни критериумите и повтори дека има силна поддршка од Чешка.

Тој додаде дека Европската Унија треба порешително да го поддржи европскиот пат на Србија, нагласувајќи дека Белград има право да води прагматична политика и да соработува со партнери како Кина и Обединетите Арапски Емирати.

Чешкиот премиер е во дводневна посета на Србија, за време на која се сретна и со српскиот премиер Ѓуро Мацут.