Средбата меѓу министрите за надворешни работи на Русија и Соединетите Американски Држави, Сергеј Лавров и Марко Рубио, заврши во Манила, на маргините на самитот на АСЕАН, објави денес Спутник.

Разговорите траеле повеќе од половина час.

Руското Министерство за надворешни работи објави дека Лавров го информирал својот американски колега за ситуацијата на линијата на поделба на фронтот во Украина и нагласил дека понатамошното вооружување на Киев е неприфатливо.

Шефот на руската дипломатија, исто така, оцени дека, како што е наведено, дестабилизирачката политика на европските земји кои се стремат да ѝ нанесат „стратешки пораз“ на Русија е неприфатлива.

„Лавров ја потврди подготвеноста на руската страна за политичко-дипломатско решавање на конфликтот и посветеноста на предлозите презентирани од американската страна на средбата меѓу претседателите Владимир Путин и Доналд Трамп во Анкориџ, а кои рускиот претседател ги прифати“, се наведува во соопштението на руското Министерство.

За време на разговорите биле разгледани регионални и меѓународни прашања, вклучително и ситуацијата во Персискиот Залив.

Лавров и Рубио го поздравија обновувањето на контактите во целосен формат меѓу руската државна корпорација „Роскосмос“ и американската НАСА, како и развојот на меѓупарламентарната соработка и културните врски.

Посебно внимание беше посветено на нормализацијата на условите за работа на дипломатските мисии на Русија и САД.

Двете страни се согласиле да продолжат со контактите меѓу министерствата за надворешни работи, вклучително и соработката во рамките на меѓународните организации.

Според дипломатскиот извор, иницијатор на состанокот била американската страна.

Во руската делегација учествуваа заменик-министерот за надворешни работи Андреј Руденко, директорот на Одделот за планирање на надворешната политика Алексеј Дробинин и постојаниот претставник на претседателот на Русија во АСЕАН Евгениј Загајнов.

Во американската делегација учествуваа заменик-државниот секретар за политички прашања Алисон Хукер и специјалниот пратеник на претседателот на САД Серхио Гор.