Германскиот канцелар Фридрих Мерц денес изјави дека оригиналниот предлог на Европската комисија за буџетот на ЕУ од речиси 2 билиони евра треба да се намали за неколку стотици милијарди евра и дека е неприфатливо да се создадат 2.500 нови работни места во институциите на ЕУ.

Зборувајќи на заедничка прес-конференција со ирскиот премиер Михаил Мартин во Даблин, Мерц го нарече планот на Европската комисија „неприфатлив и неурамнотежен“, објавува Политико.

„Затоа ни е потребен нацрт-буџет со намалувања на сите нивоа, вкупно неколку стотици милијарди евра. Овие намалувања се неопходни“, рече Мерц.

Мерц го критикуваше планот на ЕК за зголемување на бројот на вработени во ЕУ, што Брисел го нарекува „неопходен“ за справување со зголеменото работно оптоварување предизвикано од сегашните геополитички кризи.

„Неприфатливо е што сега се создаваат 2.500 нови работни места за европските институции. Ние нема да го прифатиме тоа“, рече Мерц, додавајќи дека Германија го намалува бројот на вработени во владата за осум проценти до 2029 година.

За време на претседателствувањето со Советот на ЕУ, Ирска ќе мора да поднесе нов предлог за буџет пред самитот на лидерите на ЕУ во октомври, а ирскиот премиер Мартин ќе се соочи со тешката задача да ги балансира напорите на Мерц за намалување на буџетот со спротивставениот притисок од земјите што поддржуваат поголем буџет, како што се Италија, Шпанија и Полска.