Канадскиот премиер Марк Карни ги отфрли американските обвинувања дека Канада се меша во изборите во САД, оценувајќи ги тврдењата како неосновани и повторувајќи дека неговата земја никогаш нема да стане 51. сојузна држава на Соединетите Американски Држави.

„Овие тврдења немаат никаква основа“, им рече Карни на новинарите во Анкара, одговарајќи на обвинувањата дека Отава се меша во демократските процеси во САД.

Карни рече дека Канада внимателно постапува во дипломатските контакти со САД и дека нема намера да се меша во нивните избори.

„Немаме намера да се мешаме во нивните демократски процеси“, рече тој, додавајќи дека канадското Министерство за глобални работи ги предупредило претставниците да внимаваат на своите контакти за да не дадат повод за „неосновани обвинувања“.

Изјавите доаѓаат во услови на тензии меѓу двете соседни земји во однос на политичките односи и трговијата.

„Претседателот на Соединетите Американски Држави нема никакви илузии. Сосема е јасно каков е мојот став, каков е ставот на Канада и каков е ставот на Канаѓаните. Никогаш нема да бидеме 51. сојузна држава“, рече Карни.

Тој нагласи дека Канада се подготвува да ја зајакне својата економија и да ги прошири меѓународните партнерства, оценувајќи дека посилна Канада ќе биде и подобар партнер за Вашингтон.

„Одиме по свој пат. Се подготвуваме. Силни сме и стануваме сè посилни“, рече тој.

Во врска со трговијата, Карни рече дека Отава и понатаму е подготвена да преговара со Вашингтон за договор што ќе им служи на интересите на двете земји, но дека нема да брза со постигнување договор од политички причини.