Еден израелски војник е убиен, а седум други се ранети во јужен Либан откако експлозивна направа детонираше во близина на воен команден пункт, објави израелскиот јавен радиодифузен сервис КАН рано утрово.

Инцидентот се случил додека војници од бригадата Гивати се движеле пеш во близина на предната командна станица на заменик-командантот на 36-та дивизија, се вели во извештајот.

Во извештајот се цитира изјавата на израелската војска дека „непријателска направа“ детонирала во близина на силите непосредно до реката Литани, при што со шрапнели биле ранети седум војници. Повредените биле евакуирани со хеликоптер.

Инцидентот се случи во услови на континуирани тензии по либанско-израелската граница и покрај неодамнешното меморандум меѓу Вашингтон и Техеран со цел прекин на непријателствата по нападите што ги започнаа Израел и САД против Иран на 28 февруари.

Иранските претставници постојано повторуваат дека запирањето на израелските воени дејствија на регионалните фронтови, особено во Либан, е меѓу клучните цели на меморандумот за разбирање потпишан од иранскиот и американскиот претседател.

Израел продолжува да окупира области во јужен Либан, некои со децении, а други од последниот конфликт меѓу двете страни. За време на неодамнешната воена кампања, израелските сили напредуваа повеќе од 10 километри на либанска територија.