Германскиот канцелар Фридрих Мерц денес изјави дека Украина можеби ќе мора да прифати дека делови од нејзината територија може да останат надвор од контролата на Киев според иден мировен договор со Русија, поврзувајќи ги таквите отстапки со изгледите на Украина за приклучување кон Европската Унија.

„Во одреден момент, Украина ќе потпише договор за прекин на огнот, во одреден момент, се надеваме, мировен договор со Русија. Тогаш може да се случи дел од територијата на Украина повеќе да не биде украинска“, рече Мерц во обраќањето пред учениците од средното училиште „Каролус-Магнус“ во Марсберг, во германската покраина Северна Рајна-Вестфалија, објави Ројтерс.

Мерц изјави дека ако украинскиот претседател Володимир Зеленски сака да ги информира граѓаните на Украина за овие територијални отстапки и, ако сака да добие мнозинство за тоа на референдумот, во исто време треба да каже дека на овој начин „патот кон Европа ќе биде отворен“.

Мерц истакна дека не очекува Украина брзо да се приклучи на ЕУ, наведувајќи дека земјата не може да се приклучи на Унијата додека е во војна и дека прво мора да исполни строги критериуми, вклучително и оние поврзани со владеењето на правото и борбата против корупцијата.

„Зеленски имаше идеја да се приклучи на ЕУ на 1 јануари 2027 година. Тоа нема да функционира. Дури и 1 јануари 2028 година не е реално“, заклучи Мерц.

Напредокот на Украина во пристапувањето кон ЕУ е блокиран од унгарскиот премиер во заминување Виктор Орбан, но неговиот пораз на изборите овој месец ги зголеми надежите дека Киев може да премине на следниот чекор во процесот, соопшти агенцијата.

Украина во моментов има статус на официјален кандидат за членство во ЕУ.

Минатата недела, ЕУ одобри заем од 90 милијарди евра за Украина, кој ги покрива поголемиот дел од нејзините потреби до 2027 година.