Иранскиот министер за надворешни работи, Абас Арагчи, изјави дека Техеран води интензивни дипломатски контакти преку катарски и пакистански посредници, кои вклучуваат десетици телефонски разговори и „интензивна шатл-дипломатија“.
Во изјава за иранската државна новинска агенција ИРНА, дадена по завршувањето на посетата на Туркменистан во понеделникот, Аракчи рече дека Техеран претставил јасен план и услови за дипломатско решение, оставајќи му го следниот чекор на Вашингтон.
„Ги објавивме нашите конкретни услови и го претставивме нашиот формулиран план; сега сè зависи од тоа колку политички разум ќе надвладее кај американската страна и дали постои волја да се избере мудриот пат на дипломатијата, или пак, како во претходните случаи, ситуацијата да се турне кон агресија и воени дејствија“, рече тој.
Арагчи изјави дека Иран е подготвен и за дипломатски и за воени сценарија „повеќе од кога било досега“, предупредувајќи дека секое обновување на воените дејствија или измама ќе наиде на одговор кој ќе биде „многу построг и ќе предизвика поголемо жалење отколку претходно“.
Тој нагласи дека Техеран нема да потклекне пред принуда.
„Легитимните услови“ на Иран
Повторното отворање на Ормускиот Теснец и целосното продолжување на преговорите зависат од безусловното прифаќање на „легитимните услови“ на Иран, додаде тој.
За време на посетата на Туркменистан, Арагчи истакна дека зајакнувањето на односите со соседните земји претставува „непроменлив приоритет“ на иранската надворешна политика.
Тој наведе дека посетата била фокусирана на унапредување на значајни билатерални проекти во областите на енергетиката, транзитот и економската соработка, надоврзувајќи се на договорите постигнати меѓу претседателите на двете земји на маргините на самитот на Заедницата на независни држави во Аваза.
Прашан за посетата на Пекинг на Али Багери Кани, заменик-секретар на Врховниот совет за национална безбедност на Иран, Арагчи ги опиша консултациите како дел од континуираниот стратешки и безбедносен ангажман на Техеран со клучните партнери, насочен кон регионалниот мир и стабилност.
Најновите дипломатски активности се одвиваат во услови на постојани тензии меѓу Техеран и Вашингтон, кои се однесуваат на американската поморска блокада и безбедноста во Ормускиот Теснец – витален воден пат за глобалните испораки на енергенси.
