Во своето обраќање на 81-та сесија на Генералното собрание на Обединетите нации, претседателот на Црна Гора, Јаков Милатовиќ, изјави дека меѓународната заедница – соочена со војни, геополитички ривалства, климатски промени и брз технолошки напредок – мора да ја врати довербата во мултилатерализмот, меѓународното право и институциите што ги штитат мирот и човечкото достоинство.
Милатовиќ го одбележа јубилејот од 20 годишнината на членството на Црна Гора во ОН, потсетувајќи дека земјата стана 192-ра членка на ОН во 2006 година, само неколку недели по обновувањето на својата независност.
Претставувајќи ја Црна Гора како балканска и медитеранска држава, сигурна членка на НАТО и земја што напредува кон членство во Европската Унија, Милатовиќ ја истакна нејзината посветеност на регионалната соработка и ефективниот мултилатерализам. Тој ја опиша довербата како темел на меѓународните односи и ја цитираше црногорската поговорка: „Зборот на човекот е негова обврска“.
Тој предупреди дека, осум децении по основањето на ОН, светот сè уште се соочува со војни и конфликти, истакнувајќи дека во 2025 година биле регистрирани 65 конфликти во кои биле вклучени држави, додека бројот на присилно раселените лица надминал 120 милиони.
Осврнувајќи се на европските интеграции, Милатовиќ изјави дека за Црна Гора, Европската Унија не е само дестинација, туку и патување втемелено на заеднички вредности, притоа нагласувајќи ја целта земјата да стане членка на ЕУ до 2028 година. Тој додаде дека иднината на целиот Западен Балкан е во рамките на Европската Унија и дека проширувањето претставува инвестиција во мирот, безбедноста и долгорочната стабилност на континентот.
„Нашата генерација има одговорност да го заокружи европскиот пат на Црна Гора до 2028 година и да покаже дека Балканот може да ги остави зад себе старите поделби, а на идните генерации да им остави повеќе можности отколку што самите ние сме имале“, рече црногорскиот претседател.
Црногорскиот претседател исто така нагласи дека трајното помирување во регионот не може да се заснова на негирање, селективен пристап кон правдата или величање на осудени воени злосторници, туку на почитување на пресудите на меѓународните судови и на еднаквото достоинство на секоја жртва.
Осврнувајќи се на глобалните кризи, Милатовиќ ја повтори поддршката на Црна Гора за Украина и за дипломатските напори за ставање крај на војната; Во однос на Блискиот Исток, тој изјави дека цивилите во Газа мора да бидат заштитени и дека хуманитарната помош мора непречено да стигне до населението. Исто така, ја истакна поддршката за решението со две држави, кое подразбира меѓусебно признавање меѓу Израел и независна палестинска држава.
Милатовиќ повика на реформа на Обединетите нации, вклучително и на Советот за безбедност, со цел тој да биде поефикасен и порепрезентативен, и предупреди дека предизвиците како што се климатските промени, развојот на вештачката интелигенција и новите технологии бараат посилна меѓународна соработка.
На крајот од своето обраќање, тој наведе дека одговорност на денешните лидери е на идните генерации да им остават повеќе можности отколку што самите имале, и нагласи дека Црна Гора ќе продолжи да придонесува кон мирот, меѓународната соработка и зајакнувањето на мултилатералниот поредок.
