Амбасадорите на земјите-членки на ЕУ во среда го поддржаа формирањето на aд-хок работна група која ќе почне да работи на нацрт-договорот за пристапување на Црна Гора, земјата која најмногу напредна во процесот на пристапување.
„Администрацијата на кипарските Грци вложи големи напори за да обезбеди формирање на Работната група што е можно побрзо, особено имајќи ја предвид долгата техничка работа што треба да се заврши пред самиот почеток на изготвувањето на договорот за пристапување. Убедени сме дека ова ќе испрати силен сигнал дека пристапувањето е на дофат за партнерите за проширување“, изјави портпаролката на претседателството на државата, која претседава со ЕУ во првите шест месеци од 2026.
Комесарот за проширување Марта Кос изјави во дебатата во Европскиот парламент во понеделник дека Европската Унија мора да извлече поуки од минатите проширувања за да не го повтори случајот со Унгарија, чиј долгогодишен премиер Виктор Орбан се сметаше за тројански коњ бидејќи систематски блокираше низа одлуки.
„Лекцијата научена од проширувањето во 2004 година е дека мора да имаме заштитни мерки што ќе обезбедат новите членки да ги почитуваат правилата и дека интегритетот на нашата Унија е обезбеден“, рече Кос, додавајќи дека пристапниот договор со Црна Гора ќе биде првиот што ќе ги содржи овие заштитни клаузули.
Таа истакна дека овие заштитни мерки нема да ги почувствуваат новите членки ако ги почитуваат вредностите и принципите врз кои се темели Унијата, но во спротивно би требало многу да ги почувствуваат.
„Не станува збор за создавање дополнителни критериуми за новите членки, туку за фактот дека ако земјите регресираат во однос на нашите фундаментални принципи како што се демократијата и владеењето на правото, заштитните мерки мора да бидат важни и секогаш мора да можеме да ја заштитиме нашата Унија. Ова ни е потребно за да ја зачуваме довербата меѓу земјите-членки, довербата на нашите граѓани и довербата во самиот процес на проширување“, рече Кос.
Таа, исто така, најави дека ќе презентира финансиски пакет за Црна Гора пред летото.
