Приватен авион со поразениот бразилски десничарски претседателски кандидат, Флавио Болсонаро, слета во областа на Мајами, објави новинската агенција АФП.
Авионот, кој претходно бил забележан од новинари на АФП за време на ноќно задржување во Гвајакил, Еквадор, одговара на описот на леталото за кое аргентинските власти потврдија дека го превезува Болсонаро.
Од Вашингтон изјавија дека ќе му издадат виза.
Додека целиот свет се обидуваше да открие каде се наоѓа, Болсонаро влегол во Аргентина со сопругата и двете ќерки доцна во вторникот вечерта, според податоците на тамошната служба за миграција.
Болсонаро, кој на претседателските избори во неделата загуби од левичарскиот кандидат и актуелен претседател Луиз Инасио Лула да Силва, одби да ја испочитува наредбата на Врховниот суд за предавање на неговите пасоши, влегол во Аргентина преку меѓународниот мост Танкредо Невес, пат што од неговиот дом во Бразилија трае околу 19 часа.
Потоа, семејството се качило во приватен авион на компанијата Баирес Флај С.А.(Baires Fly S.A.), кој летал кон еквадорскиот град Гвајакил, соопшти службата за миграција.
Претседателската администрација на Аргентина не одговори веднаш на барањето за коментар. Истото важи и за компанијата Баирес Флај С.А..
Според податоците на ФлајтАвер (FlightAware), авион од типот Гулфстрим Г400“ на компанијата Баирес Флај С.А. полетал од Пуерто Игуазу во 00:22 часот (3:22 ГMT) и слетал во Гвајакил во 3:46 часот (8:46 ГMT).
Потоа, авионот заминалкон аеродромот Опа-лока во Мајами, каде што слетал во 9:18 часот по локално време (13:18 ГMT).
Нејасно е како Болсонаро влегол во Еквадор. Тамошните власти не одговорија веднаш на барањето за коментар.
Раздор меѓу САД и Бразил
Заминувањето на Болсонаро се заканува да го продлабочи раздорот меѓу двете најнаселени нации на американскиот континент. Лула го обвини Вашингтон дека се договил со семејството Болсонаро за да им помогне да се вратат на власт.
Во пресрет на изборите во неделата, новинската агенција Ројтерс извести за кампања на Стејт департментот на САД за враќање на семејството Болсонаро на власт.
Трамп во средата им изјави на новинарите дека би го одобрил доаѓањето на Болсонаро во Соединетите Држави, откако Стејт департментот соопшти дека ќе им издаде влезни визи. Тој, исто така, рече дека изборите му изгледале дека се наместени.
Трамп претходно тврдеше дека таткото на Флавио, поранешниот претседател Жаир Болсонаро, бил жртва на судски прогон во Бразил.
Жаир Болсонаро исто така отпатува во Соединетите Држави откако одби да го признае поразот од Лула во 2022 година, за време на претседателскиот мандат на Џо Бајден.
Тој на крајот се врати, но подоцна беше осуден на 27 години затвор за планирање државен удар, откако неговите поддржувачи упаднаа во владините згради во Бразилија.
Болсонаро важеше за фаворит за победа на претседателските избори во неделата, но на крајот загуби, што претставуваше шокантен исход.
Болсонаро, кој го губи својот имунитет од кривично гонење со завршувањето на неговиот мандат во Сенатот во февруари, во понеделникот- откако доби налог да ги предаде своите пасоши- изјави дека нема намера да бега.
„Никогаш не сум размислувал да ја напуштам земјата“, рече тој. „Ќе ги предадам пасошите и ќе се бранам од оваа фарса, која е јасен обид да ме заплашат.“
Флавио Болсонаро е предмет на правни истраги во неколку случаи, вклучително и истрага за корупција поврзана со финансирањето на биографскиот филм Темен коњ (Dark Horse) за неговиот татко, кој се наоѓа во домашен притвор поради планирање државен удар.
