Кристал Палас и Рајо Ваљекано вечерва во 21 часот во Лајпциг ќе го играат финалето на Лигата на конференции и ќе се борат за првиот голем европски трофеј, а тепачки се случија ноќта пред дуелот помеѓу англиските и шпанските клубови.

На социјалните мрежи се појавија снимки на кои се гледаат судири меѓу навивачи во близина на угостителски објект во Лајпциг. Група мажи облечени во црни маички се упатија кон навивачи со ознаки на Кристал Палас, а потоа се вмеша и полицијата.

Потоа областа во близина на центарот на градот била блокирана, а англиските медиуми објавија дека полицијата привела десетици навивачи поради нарушување на јавниот ред и мир.

Се очекува трибините на РБ Арена да сместат 11.500 навивачи за секој клуб, но се претпоставува дека многу навивачи ќе допатуваат во Германија без билети.

Лондонскиот тим го освои ФА Купот минатата сезона и сега стигна до своето прво европско финале, додека шпанскиот клуб од мадридскиот округ Ваљекас за прв пат ќе игра во големо финале во кое било натпреварување.

„Среќни сме што сме тука со нашите семејства и пријатели. Кога ќе дојдете на ваква сцена и на ваков стадион, чувствувате нешто посебно и сакаме да го пренесеме тоа чувство на теренот“, рече тренерот на Рајо, Иниго Перез.

„Сите сонувавме како деца дека еден ден ќе играме во европско финале. Сега имаме можност да бидеме дел од таква игра и да ги покажеме нашите квалитети“, рече тренерот на Кристал Палас, Оливер Гласнер.

Кристал Палас ја заврши англиската Премиер лига на 15. место, додека Рајо во шпанската Ла Лига беше осми.

Предвидени состави

Кристал Палас: Хендерсон; Клајн, Лакроа, Канвот; Муњоз, Вартон, Камада, Мичел; Сар, Пино; Матета

Рајо Ваљекано: Батаља; Ратиу, Лејун, Цис, Чавариа; Оскар Валентин, Лопез, Иси Палазон, Гарсија, Де Фрутос; Алемао