Европската комисија во среда прелиминарно утврди дека платформите на Мета-Инстаграм и Фејсбук го прекршуваат Законот за дигитални услуги бидејќи не направиле доволно за да го ограничат пристапот до тие социјални мрежи за лица под 13 години.

Мета постави свои правила според кои лицата под 13 години не можат да пристапат до Инстаграм и Фејсбук, но истрагата на Комисијата покажува дека овие правила лесно се заобиколуваат.

На пример, при креирање сметка, малолетниците под 13 години можат да внесат лажен датум на раѓање, без воспоставени ефикасни контроли за да се потврди точноста на самопријавениот датум на раѓање. Алатката на Мета за пријавување малолетници под 13 години на платформата е тешка за користење и неефикасна, според Комисијата.

Законот за дигитални услуги бара од технолошките компании да сторат повеќе за отстранување на нелегалната и штетна содржина од своите платформи.

Комисијата наведува дека 10 до12 проценти од децата под 13 години во Европа користат Фејсбук и Инстаграм.

„Нашите прелиминарни наоди покажуваат дека Инстаграм и Фејсбук прават многу малку за да ги спречат малолетните деца да пристапат до нивните услуги“, изјави Хена Виркунен, извршен потпретседател на ЕК за технологија.

Мета сега може да одговори на прелиминарните наоди на Комисијата и да преземе мерки за решавање на жалбите. Ако се потврдат прелиминарните наоди, Комисијата може да изрече казна пропорционална на прекршокот, која не може да надмине 6 проценти од вкупниот годишен промет на давателот на услуги низ целиот свет.

Комисијата може да изрече и периодични казни за да ја принуди платформата да се придржува до регулитивата.