Европската комисија во четврток усвои две правно обврзувачки одлуки со кои се бара од Гугл да ја прошири интероперабилноста за конкурентските асистенти за вештачка интелигенција (ВИ) на Андроид уредите и да ги споделува податоците од Гугл Срч со подобни даватели на услуги за пребарување од трети страни според Законот за дигитални пазари.
Европската комисија соопшти дека мерките имаат за цел да обезбедат пофер конкуренција со тоа што ќе им дадат на конкурентските ВИ услуги пристап до клучните функционалности на Aндроид што моментално се достапни на сопствениот асистент за ВИ на Гугл, Џемини, а воедно ќе го подобрат пристапот до податоците за пребарување за алтернативни пребарувачи и услуги за пребарување со ВИ.
Според првата одлука, Гугл мора да им овозможи на асистентите за ВИ од трети страни да пристапат до функциите на системот Андроид што им овозможуваат на корисниците да ги активираат преку гласовни команди и да извршуваат задачи низ апликациите, слично на Џемини.
Комисијата изјави дека корисниците ќе можат да избираат алтернативни асистенти за ВИ за да извршуваат дејства како што се резервација на такси, генерирање предложени одговори во апликациите за пораки или одговарање на прашања врз основа на неодамна посетени локации.
Втората одлука ги утврдува правилата што ја регулираат обврската на Гугл да споделува анонимизирани податоци од Гугл пребарувачот со подобни даватели на услуги за пребарување од трети страни, вклучувајќи ги и чет-ботовите за ВИ што нудат функционалност за пребарување.
Според ЕК, пристапот до податоците за пребарување е од суштинско значење за конкурентите да ги развијат и подобрат услугите за пребарување и да ја намалат конкурентската предност на Гугл на пазарот, каде што има акумулирано податоци од голем обем во текот на многу години.
Комисијата, исто така, воспостави методологија за одредување цени за пристап до споделените податоци и транспарентен процес за компаниите што ги исполнуваат условите за да ги добијат.
Гугл ќе ја задржи можноста да процени дали споделувањето податоци со одредени приматели претставуваат значителни ризици за сајбер безбедноста или заштитата на податоците пред да обезбеди пристап.
Комисијата соопшти дека Гугл мора да започне со споделување на податоци за пребарување со подобни даватели на услуги од јануари 2027 година, додека се очекува мерките за интероперабилност на Андроид да станат достапни за корисниците од јули 2027 година.
