Американскиот претседател Доналд Трамп изјави дека Вашингтон ќе го смета Техеран за одговорен доколку групата Хути од Јемен нападне комерцијален брод во водите на Заливот.

„Пред една година, САД силно ги нападнаа Хутите за нивното нарушување на трговијата и комерцијалните текови со нападите врз бродови“, напиша Трамп на платформата Truth Social.

„Оттогаш, и во текот на целиот наш конфликт со Иран, тие дејствуваа многу одговорно. За жал, сега повторно почнуваат, пукајќи врз два саудиски брода синоќа“, додаде тој.

„Нека оваа ВИСТИНА послужи како порака дека ако го сторат ова повторно, САД ќе го сметаат Иран за одговорен, бидејќи Хутите се застапници и/или сојузници на Иран, а Иран ќе биде строго казнет воено, како и самите Хути, од кои сум многу разочаран бидејќи досега дејствуваа многу професионално и интелигентно.“

Неговите коментари дојдоа откако групата Хути од Јемен претходно соопшти дека извршила воена операција насочена кон два саудиски танкери за нафта со балистички и крстосувачки ракети, како и беспилотни летала.

Американскиот државен секретар Марко Рубио изјави дека Хутите треба „да се држат настрана“ од конфликтот со Иран, тврдејќи дека Техеран ги „вовлекол“ во војната на Блискиот Исток.

„Се надевам дека ќе престанат. Не треба да го прават ова. Иранците ги вовлекоа во ова“, им рече Рубио на новинарите.