Компаниите Волт Дизни и ТикТок објавија во среда глобален договор за споделување содржини што ќе им овозможи на креаторите учесници во програмата да продуцираат кратки видеа користејќи сцени и друг материјал од филмови и телевизиски емисии на Дизни.
Програмата првично ќе биде тестирана во САД во наредните месеци пред да се прошири на други пазари, соопштија компаниите во заедничко соопштение.
ТикТок ќе им обезбеди на креаторите пристап до средства поврзани со стотици продукции од обемната библиотека со содржини на Дизни.
Креаторите кои ќе се пријават за програмата ќе можат да користат ликови, сцени и приказни од брендови и франшизи, вклучувајќи ги Пиксар (Pixar), Марвел (Marvel), Стар Ворс (Star Wars) и FX.
Нивните видеа ќе бидат објавени на ТикТок и вклучени во внимателно избран и постојано надополнуван стрим на Вертс (Verts), функцијата за вертикално видео во рамките на мобилната апликација Дизни+.
Содржината прикажана на Дизни+ ќе се освежува редовно за да ги одрази тековните дискусии на обожавателите и да ги охрабри претплатниците да истражуваат повеќе филмови и телевизиски програми на компанијата.
Финансиските детали од договорот не беа откриени.
„Најдобрите раскажувачи се пред сè обожавателите“, рече главниот маркетинг и бренд директор на Дизни, Асад Ајаз.
„Оваа соработка создава нов мост помеѓу приказните што ги раскажуваме и креативноста што ја инспирираат“, додаде тој.
Даун Јанг, шеф на глобалната забава на TикТок, рече дека креаторите помогнале да се продолжи животниот век на филмовите и телевизиските емисии претворајќи ги во дискусии што другите обожаватели би можеле да ги откријат и споделат.
„Заедно со Дизни, го носиме автентичниот израз на креаторите од заедницата ТикТок на Дизни+“, рече таа.
Програма Амбасадор за креатори
Компаниите, исто така, ќе воспостават Дизни Програма Амбасадор за креатори, које ќе биде заеднички управувана.
Избраните креатори ќе добијат поголема видливост, пристап до ексклузивни настани, можности за развој на кариерата и други награди, според соопштението.
Дизни и TикТок рекоа дека видеата креирани од фановите играат сè поважна улога во тоа како публиката открива и се вклучува во забавата.
Внатрешните податоци на TикТок покажаа дека корисниците споделувале на платформата просечно 6,5 милиони објави поврзани со филмови и телевизија секој ден минатата година.
Речиси половина од гледачите вклучени во посебна анкета рекле дека подоцна гледале филм или телевизиска програма откако откриле поврзана содржина на TикТок.
Дизни го лансираше Вертс за претплатниците на Дизни+ во САД во март како вертикален фид првенствено за мобилни уреди.
Функцијата првично им овозможуваше на корисниците да прелистуваат сцени од продукции на Дизни+, да додаваат наслови во нивните листи за гледање или директно да почнат да ја гледаат целата програма.
Дизни во тоа време изјави дека планира да го прошири Вертс надвор од откривањето содржини со воведување видеа продуцирани од креаторите и дополнителни кратки формати.
Извор: АА
