Европската Унија (ЕУ) би можела да се соочи со недостиг од природен гас до 14 милијарди кубни метри оваа зима, што одговара на околу 7 отсто од побарувачката на Унијата, во услови на намалени залихи во складиштата и нарушувања во глобалното снабдување со енергенси.

Во извештајот на американскиот Институт за енергетска економија и финансиска анализа (ИЕЕФА), споделен со „Политико“ денес, се предупредува дека резервите на гас во ЕУ се намалиле на нешто над 70 отсто од капацитетот, што е најниско ниво за овој период од годината откако започнале да се водат евиденциите во 2011 година.

Потенцијалниот недостиг би можел да влијае врз снабдувањето со енергија во обем еквивалентен на потрошувачката на 10 до 12 милиони европски домаќинства, што предизвикува загриженост поради повисоките сметки за електрична енергија и можните мерки за заштеда на енергија.

Високите цени ги поттикнале трговците да продаваат гас во текот на летото наместо да ги надополнуваат складиштата пред зимата, оставајќи ја Унијата со помали резерви за справување со евентуални прекини во снабдувањето.

Наодите се совпаѓаат и со процената за снабдувањето во зимата 2026–2027 година, објавена од Европската мрежа на оператори на преносни системи за гас (ЕНТСОГ).

Во извештајот се предупредува дека, во сценарио со студена зима, нивото на пополнетост на складиштата би можело да се намали на само 11 отсто доколку увозот на течен природен гас (ЛНГ) биде ограничен или остане на оптималното ниво.

За резервите да се обноват до 30 отсто до крајот на зимата, ЕУ би можела да биде принудена да ја намали потрошувачката на гас за обем еквивалентен на 7 отсто од побарувачката или да го ограничи снабдувањето на потрошувачите, според ЕНТСОГ.

Забраната на ЕУ за долгорочни договори за увоз на руски течен природен гас, што треба да стапи во сила во јануари, се очекува дополнително да го намали увозот на гас за 7 милијарди кубни метри, се наведува во извештајот на ИЕЕФА.

Во меѓувреме, побарувачката за гас во зимските месеци е зголемена во изминатите две години, додека увозот останал главно непроменет, со што се зголемила зависноста на Унијата од резервите во складиштата.

ЕУ би можела да се насочи кон дополнителен увоз на течен природен гас, особено од САД, за да ги надомести потенцијалните загуби во снабдувањето.

Сепак, замената на недостасувачките количини по сегашните цени би чинела дополнителни 3 милијарди евра, што претставува зголемување од 12 отсто во споредба со трошоците за истите количини минатата година, според ИЕЕФА.