Një ndërprerje globale që preku shërbimet e Microsoft-it shkaktoi sot probleme në institucionet qeveritare, administratat publike dhe shërbime të tjera publike në disa vende evropiane.

Në Norvegji, disa ministri raportuan probleme me qasjen në shërbimet e Microsoft-it, përfshirë postën elektronike, që nga mbrëmja e së enjtes.

Ministria e Digjitalizimit dhe Administratës Publike tha për transmetuesin norvegjez NRK se Organizata për Digjitalizim (DIO) e ministrisë kishte kontaktuar Microsoft-in, i cili u përgjigj se po punonte për zgjidhjen e problemit.

Policia norvegjeze hasi në vështirësi me Microsoft Teams, veçanërisht gjatë kryerjes së thirrjeve ose pjesëmarrjes në mbledhje si dhe pati ndërprerje në Microsoft Copilot. Megjithatë, Drejtoria e Policisë bëri të ditur se këto ndërprerje nuk prekën sistemet qendrore të policisë apo kapacitetet e saj operacionale.

Edhe Parlamenti i Norvegjisë u prek nga ky problem, ku të gjithë ligjvënësit raportohet se humbën qasjen në shërbimet e postës elektronike. Në Danimarkë, parlamenti raportoi gjithashtu probleme operacionale me shërbimet e postës elektronike ndërsa sistemet e tjera vazhdojnë të funksionojnë normalisht.

Sipas transmetuesit DR, i cili citon burime lokale, rreth 80 deri në 90 bashki daneze janë prekur nga kjo ndërprerje. Në Mbretërinë e Bashkuar, miliona njerëz janë prekur, pasi ndërprerja ka patur "ndikim serioz" në Shërbimin Kombëtar të Shëndetësisë (NHS) të vendit.

Një sërë faqesh zyrtare qeveritare raportuan se aktualisht nuk mund të marrin e-maile për shkak të një ndërprerjeje globale të Microsoft-it.

"Ofsted aktualisht nuk mund të marrë e-maile për shkak të një ndërprerjeje globale të Microsoft-it. Ju lutemi, mos dërgoni e-maile te Ofsted në këtë moment", njoftoi zyra për Standardet në Arsim, Shërbimet për Fëmijët dhe Aftësitë në këtë vend.