Türkiye synon të vërë në funksion stacionin e parë operacional të furnizimit me hidrogjen në fillim të vitit 2027, përmes një projekti pilot në provincën veriperëndimore të Balikesirit, i cili synon të dëshmojë potencialin e transportit rrugor të automjeteve të rënda me hidrogjen.

Murat Asci, bashkëthemelues i kompanisë "Biga Hydrogen", tha për Anadolu në margjinat e Konferencës së 31-të të Palëve (COP31) të Konventës Kornizë të OKB-së për Ndryshimet Klimatike në Antalya se projekti do të bashkojë në një lokacion të vetëm prodhimin e hidrogjenit, furnizimin me të dhe teknologjinë e automjeteve.

Nisma po zhvillohet në Balikesir në kuadër të përpjekjeve për krijimin e infrastrukturës së hidrogjenit dhe demonstrimin e potencialit të tij për përdorim në transportin rrugor të mallrave.

Asci tha se projekti do të përfshijë një stacion furnizimi me hidrogjen, i cili do të mundësojë furnizimin e kamionëve me presion prej 700 barësh, një impiant për prodhimin e hidrogjenit dhe një kamion me qelizë karburanti që funksionon me hidrogjen.

Lokacioni është përzgjedhur për shkak se Balikesiri ndodhet përgjatë korridorit strategjik rrugor që lidh Izmirin me Istanbulin, një nga rrugët kryesore të transportit në Türkiye.

“Balikesiri ndodhet në një pozicion strategjik, në gjysmën e rrugës mes Izmirit dhe Istanbulit, përgjatë një prej korridoreve më të mëdha rrugore të Türkiyes”, tha ai, duke shtuar se kompania synon të mundësojë transportin e kamionëve me hidrogjen përgjatë kësaj rruge përmes stacionit të planifikuar të furnizimit.

Ai shtoi se bashkimi i këtyre tri komponentëve në një lokacion të vetëm do t’i mundësojë kompanisë demonstrimin e teknologjisë përmes zbatimit praktik. Sipas tij, investimi i planifikuar përfshin 250 milionë lira turke (5,7 milionë dollarë) për stacionin pilot të furnizimit dhe 3 miliardë lira (68,2 milionë dollarë) për impiantin industrial.

- Planet për zgjerimin e projektit pilot në shkallë industriale

Asci tha se pas fazës fillestare, kompania planifikon të kërkojë stimuj shtesë nga Agjencia e Zhvillimit e Marmarasë Jugore për zgjerimin e impiantit pilot në shkallë industriale.

Ai theksoi potencialin e Balikesirit, Çanakkalasë, Manisës dhe Izmirit për prodhimin dhe eksportin e hidrogjenit, duke nënvizuar rëndësinë e bashkëpunimit mes sektorit publik dhe atij privat në zhvillimin e këtij sektori.

Projekti synon të dëshmojë potencialin e kamionëve me hidrogjen përgjatë korridorit Izmir-Istanbul, duke hapur rrugën për investime të mëtejshme në infrastrukturën e hidrogjenit.