Ministri i Jashtëm turk, Hakan Fidan do të presë nesër një takim të Këshillit të Ministrave të Jashtëm të Organizatës së Shteteve Turkike (OTS), në kuadër të samitit të 13-të të organizatës.

Sipas burimeve nga Ministria e Jashtme e Türkiyes, ministrat e Jashtëm të shteteve anëtare do të mblidhen për herë të pestë këtë vit, me një takim të rregullt dhe katër takime joformale të këshillit, në takimin që do të mbahet në Ankara më 29 dhe 30 tetor.

Në takim pritet të zhvillohen konsultime për fushat e bashkëpunimit brenda organizatës dhe përpjekjet për forcimin e strukturës së saj institucionale. Në përfundim të takimit, pjesëmarrësit pritet të miratojnë disa dokumente administrative dhe financiare që lidhen me funksionimin e organizatës.

Fidan gjithashtu pritet të zhvillojë takime dypalëshe me homologët e tij në margjinat e takimit.

Në fjalimin e tij, Fidan pritet të theksojë se dialogu politik dhe kapaciteti për veprim të përbashkët ndërmjet shteteve turke janë forcuar nën ombrellën e organizatës ndërsa lidhjet e përbashkëta historike, gjuhësore e kulturore dhe lidhjet vëllazërore janë shndërruar në bashkëpunim konkret.

Gjatë kryesimit të organizatës nga Türkiye, Fidan pritet të nënvizojë se prioritetet do të përfshijnë rritjen e kapaciteteve institucionale të organizatës, përmirësimin e burimeve dhe kapaciteteve njerëzore e financiare të sekretariatit të saj si dhe forcimin e koordinimit ndërmjet organizatave të bashkëpunimit turk.

Ai pritet gjithashtu të theksojë rëndësinë e shndërrimit të bashkëpunimit ekonomik dhe strategjik në rezultate konkrete, veçanërisht në fushat e energjisë, tregtisë, investimeve, transformimit digjital dhe industrisë së mbrojtjes.

Fidan pritet të vërë në pah rëndësinë e forcimit të Korridorit të Mesëm Transkaspik për përmirësimin e ndërlidhjes ndërmjet Azisë dhe Evropës dhe për forcimin e qëndrueshmërisë ekonomike.

Ai pritet të tërheqë vëmendjen te zhvillimet në Afganistan dhe ndikimi i tyre në sigurinë, stabilitetin dhe ndërlidhjen rajonale, duke theksuar nevojën për rritjen e konsultimeve dhe koordinimit për këtë çështje ndërmjet shteteve anëtare dhe vëzhguese.

- Organizata e Shteteve Turkike

Organizata u themelua si Këshilli i Bashkëpunimit të Shteteve Turkfolëse, në bazë të Marrëveshjes së Nakhçivanit, të nënshkruar më 3 tetor 2009 nga Türkiye, Azerbajxhani, Kazakistani dhe Kirgistani. Emri i saj u ndryshua në Organizatën e Shteteve Turkike në samitin e Istanbulit në vitin 2021.

Objektivat kryesore të saj përfshijnë forcimin e besimit të ndërsjellë dhe solidaritetit politik ndërmjet shteteve turkike, zhvillimin dhe thellimin e bashkëpunimit ekonomik dhe teknik si dhe dokumentimin dhe promovimin e trashëgimisë historike dhe kulturore të botës turke.

Me seli në Istanbul, OTS-ja ka pesë anëtarë - Türkiye, Azerbajxhanin, Kirgistanin, Kazakistanin dhe Uzbekistanin si dhe katër vëzhgues: Hungarinë, Turkmenistanin, Republikën Turke të Qipros Veriore (RTQV) dhe Organizatën e Bashkëpunimit Ekonomik.

- Samiti i 13-të i Organizatës së Shteteve Turkike

Samiti i 13-të i OTS-së do të mbahet në Ankara më 29 dhe 30 tetor, nën mikpritjen e presidentit turk Recep Tayyip Erdoğan.

I frymëzuar nga vizioni i Erdoğanit për Shekullin e Botës Turkike dhe motoja e Ismail Gasprinskit, samiti do të zhvillohet me temën "Shekulli Turk: Unitet në gjuhë, mendim dhe veprim".