Numri i vendbanimeve dhe toka të paligjshme izraelite në Bregun Perëndimor të pushtuar ka arritur në 592, ndërsa Izraeli kontrollon rreth 42 për qind të territorit, njoftoi të shtunën një institucion qeveritar palestinez.

Të dhënat u publikuan nga Komisioni për Rezistencën ndaj Murit dhe Vendbanimeve në një raport mbi treguesit kryesorë të zgjerimit të vendbanimeve izraelite dhe kontrollit të tokave palestineze.

Sipas komisionit, deri në fund të korrikut në Bregun Perëndimor, përfshirë Kudsin Lindor të pushtuar, jetonin 780.000 pushtues izraelitë.

Prej tyre, rreth 333.600 jetojnë në vendbanimet e paligjshme në Kuds, ndërsa 446.400 në pjesë të tjera të Bregut Perëndimor.

Pushtuesit izraelitë janë të shpërndarë në 192 vendbanime të paligjshme dhe 400 toka koloniale, përfshirë 231 toka blegtorale, sipas komisionit.

Komisioni tha se urdhrat zyrtarë izraelitë tregojnë se kontrolli i Izraelit shtrihet në 42 për qind të sipërfaqes prej rreth 5.660 kilometrash katrorë të Bregut Perëndimor.

Ai shtoi se Izraeli kontrollon 71 për qind të Zonës C dhe deri në 91 për qind të Luginës palestineze të Jordanit.

Bregu Perëndimor u nda në zonat A, B dhe C sipas Marrëveshjes së Oslos II të vitit 1995. 

Zona A është nën kontrollin administrativ dhe të sigurisë palestineze, Zona B nën kontrollin administrativ palestinez dhe atë të sigurisë izraelite, ndërsa Zona C, që përbën rreth 60 për qind të Bregut Perëndimor, është nën kontrollin e plotë izraelit.

Bregu Perëndimor ka përjetuar përshkallëzim të vazhdueshëm të ofensivave ushtarake izraelite dhe sulmeve të pushtuesve që kur Izraeli nisi luftën gjenocidale në Rripin e Gazës në tetor 2023. Në të njëjtën kohë janë zgjeruar avanpostet e paligjshme, janë ndërtuar rrugë vetëm për pushtuesit dhe janë ashpërsuar kufizimet ndaj lëvizjes së palestinezëve.