Liderët e vendeve të Paqësorit u mblodhën sot në Fixhi për bisedime përgatitore në prag të Konferencës së OKB-së për Ndryshimet Klimatike (COP31), e cila do të mbahet në Türkiye muajin e ardhshëm.

"Oqeani dhe ekonomia blu duhet të jenë në qendër të negociatave tona për klimën dhe ne duhet të përfshijmë lidhjen mes oqeanit dhe klimës në këto negociata", tha ministrja e Mjedisit dhe Ndryshimeve Klimatike e Fixhit, Lynda Tabuya.

Tabuya po i drejtohej takimit në qytetin Naxhi të Fixhit, ku këtë javë po mbahet takimi i vendeve të Paqësorit në kuadër të përgatitjeve për COP31, raportoi FBC News.

"Komunitetet e Paqësorit varen shumë nga oqeani për ushqim, jetesë dhe veprimtari ekonomike, duke e bërë investimin më të madh në mbrojtjen e oqeanit dhe zhvillimin e qëndrueshëm thelbësor", tha ajo duke bërë thirrje për kufizimin e ngrohjes globale në objektivin prej 1,5 gradë dhe theksuar se financimi klimatik duhet të arrijë më shpejt dhe në mënyrë më të drejtë te komunitetet e cenueshme.

Tabuya tha se Fixhi do të kërkojë ndërveprime më të fuqishme për transportin detar të pastër, energjinë e rinovueshme, peshkimin e qëndrueshëm dhe mbrojtjen e oqeaneve. "Oqeani ynë është në qendër të zgjidhjes për klimën dhe veprimi klimatik nuk mund të ketë sukses pa e vendosur atë në qendër", shtoi ajo.

Konferenca e OKB-së COP31 do të mbahet në qytetin mesdhetar Antalya nga 9 deri më 20 nëntor.