Shtetet e Bashkuara dhe Irani mund të finalizojnë “brenda 24 orëve” një marrëveshje për t’i dhënë fund luftës, tha Pakistani, ndërmjetësi kryesor në negociata.
Ndërkohë, Irani deklaroi se memorandumi i mirëkuptimit me ShBA-në nuk pritet të nënshkruhet të dielën, por shtoi se mundësia e nënshkrimit të Memorandumit të Islamabadit në ditët në vijim nuk përjashtohet.
“Jemi më pranë një marrëveshjeje paqeje se kurrë më parë”, shkroi të shtunën në X kryeministri pakistanez Shehbaz Sharif, vendi i të cilit ka luajtur rol kyç në bisedimet e paqes.
“Me finalizimin që pritet me gjasë brenda 24 orëve të ardhshme, Pakistani po përgatitet për nënshkrimin elektronik të marrëveshjes së paqes menjëherë pas kësaj, i pasuar nga bisedime në nivel teknik javën e ardhshme”, tha ai.
Zëdhënësi i Ministrisë së Jashtme të Iranit, Esmaeil Baghaei, tha se memorandumi i mirëkuptimit me ShBA-në nuk pritet të nënshkruhet të dielën, ndërsa theksoi se mundësia e nënshkrimit të Memorandumit të Islamabadit në ditët në vijim nuk mund të përjashtohet.
Baghaei theksoi se Teherani duhet të mbetet i kujdesshëm në komentet për një datë konkrete nënshkrimi, duke përmendur hezitimin e palës tjetër dhe duke nënvizuar se zhvillimet në negociata mbeten të ndryshueshme.
Ministri i Jashtëm iranian Abbas Araghchi shkroi të premten në një postim në rrjetet sociale se “Memorandumi i Mirëkuptimit i Islamabadit nuk ka qenë kurrë më pranë”, duke iu referuar kryeqytetit pakistanez, ku më herët janë zhvilluar bisedime.
Megjithatë, të dyja palët kanë publikuar informacione shumë të ndryshme për përmbajtjen e marrëveshjes, teksa përpiqen të tregojnë se kanë dalë nga lufta me epërsi.
Teherani ka këmbëngulur në të drejtën e tij për pasurimin e uraniumit dhe për ruajtjen e kontrollit mbi Ngushticën e Hormuzit, që duket se bie ndesh me vijat e kuqe të kahershme të Uashingtonit.
Përplasje të reja shpërthyen të shtunën në ngushticë, ndërsa Shtetet e Bashkuara thanë se rrëzuan disa dronë iranianë që kishin në shënjestër anije tregtare.
Komanda Qendrore e ushtrisë amerikane, CENTCOM, e cila mbikëqyr operacionet e ShBA-së në rajon, shkroi në X se Irani kishte “lëshuar disa dronë sulmues njëdrejtimësh në përpjekje për të goditur anijet tregtare që kalonin nëpër ngushticë”.
“Forcat amerikane i kanë rrëzuar të gjithë në orët e fundit, ndërsa qarkullimi përmes ngushticës vazhdon pa pengesa”, shtoi ajo.
“E pandershme”
Presidenti amerikan Donald Trump mohoi të premten se marrëveshja e paqes që po finalizohet favorizon Iranin.
“Kushtet që Irani i nxori për mediat e rreme nuk kanë asnjë lidhje me kushtet për të cilat është rënë dakord me shkrim”, shkroi Trumpi në platformën Truth Social.
Araghchi bëri thirrje për kujdes, duke u thënë mediave shtetërore iraniane se derisa të arrihet një marrëveshje e plotë për të gjitha çështjet, “nuk mund të thuhet me siguri se është arritur një mirëkuptim”.
Ai dha disa detaje mbi marrëveshjen, duke thënë se ajo parashikon heqjen e bllokadës detare amerikane dhe ndryshime të paspecifikuara në administrimin e ngushticës.
Ai tha gjithashtu se e vetmja mënyrë për t’u marrë me uraniumin e pasuruar të Iranit, për të cilin Uashingtoni pretendon se është pjesë e një programi për armë bërthamore, “është hollimi i tij brenda Iranit”.
Ministri i Jashtëm shtoi se çdo marrëveshje do të nënshkruhej “në distancë”, megjithëse Zvicra tha të premten se kishte propozuar që nënshkrimi të bëhej atje.
Ministri i Jashtëm i Pakistanit, Ishaq Dar, tha në një deklaratë të shtunën se kishte biseduar me homologun e tij zviceran për procesin e paqes, biseda e dytë mes tyre brenda dy ditësh.
Araghchi tha të premten se marrëveshja mund të nënshkruhet “në ditët në vijim”, ndërsa një zyrtar i lartë amerikan, gjatë një bisede me gazetarët, shprehu gjithashtu optimizëm se ajo do të finalizohej “gjatë ditëve të ardhshme”.
