Udhëheqësit e Shoqatës së Kombeve të Azisë Juglindore (ASEAN) kanë miratuar një deklaratë për “rekrutimin e drejtë dhe etik" të punëtorëve migrantë.
Siç raporton Manila Times, Deklarata, e miratuar në ditën e hapjes së Samitit të 49-të të Liderëve të ASEAN-it në kryeqytetin Manila të Filipineve vendos mekanizma më të fuqishëm të përgjegjësisë rajonale dhe e synon cenueshmëritë e reja në migracionin e fuqisë punëtore.
Duke njoftuar miratimin e deklaratës, sekretari filipinas për Punëtorët Migrantë, Hans Leo Cacdac, tha se dokumenti i zgjeron instrumentet ekzistuese rajonale të punës për të mbrojtur më mirë rreth 600.000 punëtorë filipinas jashtë vendit në gjithë Azinë Juglindore, si dhe punëtorët e tjerë migrantë të vendeve anëtare të ASEAN-it.
"Punëtorët filipinas jashtë vendit mund të jenë të sigurt se Filipinet, nën kryesimin e tyre dhe udhëheqjen e presidentit, do të vazhdojnë t'i shndërrojnë këto zotime rajonale në politika dhe programe që u përgjigjen nevojave të tyre", tha Cacdac.
ASEAN po zhvillon samitin e 49-të dhe takimet përkatëse në Manila, ndërsa Filipinet pritet t'ia dorëzojnë kryesimin Singaporit të martën, në përfundim të samitit treditor.
Gjatë këtij takimi treditor, blloku pritet të mbajë samite të veçanta me Kinën, Japoninë, Australinë, Indinë, Korenë e Jugut dhe ShBA-në.
Presidenti amerikan, Donald Trump, pritet të mbërrijë të martën.
Blloku u themelua në vitin 1967 dhe aktualisht ka 11 anëtarë, përkatësisht Brunein, Kamboxhian, Indonezinë, Laosin, Malajzinë, Mianmarin, Filipinet, Singaporin, Tajlandën, Vietnamin dhe Timorin Lindor.
