Rastet e shtatë llojeve të kancerit janë rritur ndjeshëm te personat nën 50-vjeç në Angli, sipas një analize të publikuar të martën nga Fondi Botëror për Kërkimin e Kancerit. 

Organizata analizoi të dhënat zyrtare të regjistrave të kancerit për 12 lloje të kancerit në Angli gjatë periudhës 2001-2023. Rritje të ndjeshme të numrit të rasteve u regjistruan për kancerin e gjirit, zorrës së trashë dhe rektumit, veshkave, mëlçisë, pankreasit, prostatës dhe mitrës.

Rritja më e madhe proporcionale u vu re te kanceri i prostatës. Numri i diagnozave te burrat nën 50 vjeç u rrit nga 158 në vitin 2001 në 640 në vitin 2023, pra më shumë se katërfish. Shkalla e rasteve u rrit nga 1 në 3,6 raste për 100.000 burra.

Pavarësisht rritjes, kanceri i prostatës mbetet i rrallë në këtë grupmoshë, me më pak se katër raste për 100.000 burra në vitin 2023.

Edhe kanceri kolorektal me shfaqje të hershme u rrit ndjeshëm. Te gratë, shkalla u rrit nga 3,8 në 8,3 raste për 100.000, ndërsa te burrat nga 4 në 8,4 raste për 100.000.

Shkalla e kancerit të mitrës u më shumë se dyfishua, nga 1,8 në 3,9 raste për 100.000 gra. Kanceri i veshkave u rrit nga 1,2 në 2,3 raste për 100.000 gra dhe nga 1,9 në 3,6 raste te burrat.

Kanceri i gjirit mbeti lloji më i diagnostikuar i kancerit te gratë nën 50 vjeç, me shkallën e rasteve që u rrit nga 42 në 47,5 raste për 100.000 gra. Rritje më të vogla u regjistruan gjithashtu për kancerin e mëlçisë dhe pankreasit.

Analiza shqyrtoi gjithashtu të dhënat e regjistrave nga ShBA-ja dhe Holanda. Rritje të ndjeshme u identifikuan në pesë lloje kanceri në ShBA - gjirit, kolorektal, veshkave, pankreasit dhe mitrës - dhe në katër lloje në Holandë: qafës së mitrës, kolorektal, veshkave dhe mëlçisë.