Ministri i Drejtësisë i Türkiyes, Akin Gurlek, ka bërë të ditur se autoritetet kanë ndaluar 85 të dyshuar dhe kanë ndërmarrë masa ndaj 207 personave, në kuadër të një hetimi në vazhdim për manipulime të dyshuara që përfshijnë fonde investimi dhe aksione, si dhe ka theksuar se hetimi nuk duhet të dëmtojë besimin në tregjet financiare të vendit.

Duke folur për Anadolu në Redaksinë e saj në kryeqytetin Ankara, Gurlek tha se hetimi u nis pas ankesave dhe denoncimeve nga publiku, si dhe pas autorizimit të dhënë nga Bordi i Tregjeve të Kapitalit (SPK) për nisjen e hetimit.

Gurlek tha se gjatë kohës kur ishte kryeprokuror publik i Stambollit, në shkurt të vitit 2025 autoritetet vunë re aktivitet të pazakontë në disa fonde dhe aksione dhe dërguan një njoftim zyrtar. Ai tha se ankesat nga publiku u morën në muajin gusht të këtij viti, pas së cilave SPK-ja dha lejen për një hetim formal.

Ai tha se autoritetet duhet të bëjnë dallimin mes fitimeve të ligjshme dhe atyre të paligjshme, duke iu referuar fitimeve që dyshohet se janë realizuar përmes blerjes dhe shitjes së shpejtë të të ashtuquajturave “aksione flluskë”.

“Ne e vumë re vetë këtë dhe kolegët tanë i shkruan SPK-së për të kërkuar autorizim për një hetim. Madje zhvilluam edhe bisedime personalisht. Natyrisht, edhe ministri ynë i Thesarit dhe i Financave po e ndiqte procesin dhe kishte bërë deklarata për fondet. Autorizimi për hetim u dha përfundimisht pas memorandumit që dërguam në gusht. Kështu filloi hetimi mbi fondet”, tha Gurlek.

Ai theksoi se prokurorët mund të hetojnë veprat përkatëse vetëm pasi të jetë dhënë autorizimi.

“Tregjet turke dhe ekonomia turke janë shumë të forta. Ato janë shumë të rëndësishme për ne. Nuk duhet ta përgjithësojmë një incident që ka ndodhur në një pjesë të vogël të këtij tregu”, tha ai.

Gurlek tha se presidenti Recep Tayyip Erdoğan e ka ndjekur procesin që nga fillimi dhe se autoritetet e informojnë rregullisht. Ai shtoi se ka zhvilluar takime të shpeshta me ministrin e Thesarit dhe Financave, Mehmet SimSek dhe se nën drejtimin e zv/presidentit Cevdet Yilmaz është krijuar një Bord për Koordinimin e Fondeve.

“Transaksionet e zakonshme ditore janë plotësisht në kuadër të ekonomisë së tregut të lirë dhe janë në diskrecionin e bordeve përkatëse”, tha Gurlek, duke shtuar se prokurorët veprojnë mbi bazën e ankesave, denoncimeve dhe autorizimeve për hetim.

- 85 të dyshuar të ndaluar

I pyetur për përmasat e hetimit, Gurlek tha se SPK-ja vendosi më 17 shtator të likuidonte fondet në fjalë.

“Sapo u mor vendimi, zyra e kryeprokurorit publik mori të gjitha masat parandaluese në kuadër të autorizimeve për hetim të dhëna”, tha ai.

“Deri tani, 85 të dyshuar janë ndaluar, ndaj 207 personave janë ndërmarrë masa dhe pasuritë e shumë personave janë ngrirë. Kolegët tanë kanë marrë gjithashtu masat e nevojshme për të parandaluar transferimin ose fshehjen e pasurive”, shtoi ai.

Gurlek tha se autoritetet kishin parandaluar një përpjekje për transferimin jashtë vendit të 40 milionë lirave turke (813.345 dollarë) nga bashkëshorti/bashkëshortja e një personi që u ndalua dy ditë pas fillimit të hetimit.

Ai tha gjithashtu se Këshilli Shtetëror i Mbikëqyrjes ishte përfshirë për të shqyrtuar nëse ndonjë institucion publik kishte neglizhuar detyrat e tij apo nëse kishte pasur shkelje, qëllim të keq ose keqdashje.

Sipas tij, prokurorët kanë shqyrtuar listat e siguruara nga SPK-ja, Bursa e Stambollit dhe Depozitari Qendror i Letrave me Vlerë, si dhe kanë vendosur masa ndaj individëve dhe kompanive të dyshuara se kanë realizuar fitime jashtëzakonisht të mëdha përmes transaksioneve manipuluese.

“Ne tashmë kemi nisur një hetim për këto çështje… Zyra e Kryeprokurorit Publik të Stambollit ka vendosur masa parandaluese ndaj personave që janë përfshirë në aktivitete manipuluese dhe kanë siguruar fitime të tepërta ose të pazakonta brenda një periudhe të shkurtër”, tha ai.

“Pasuritë e tyre janë ngrirë. Disa janë ndaluar, ndërsa të tjerë janë në arrati. Ka gjithashtu ndalime për udhëtime jashtë vendit. Procesi vazhdon. E gjithë kjo është nën mbikëqyrjen e gjyqësorit të pavarur”, shtoi ai.

- 5 persona kthyen paratë

Gurlek tha se qeveria po punon për të mbrojtur investitorët e ligjshëm nga ndikimi i hetimit.

“Tregjet turke, fondet dhe Bursa e Stambollit janë shumë të rëndësishme për ne. Këtu po zhvillohet një proces. Ne po e trajtojmë me shumë kujdes. Investitorët tanë me qëllime të mira, aksionet tona dhe kompanitë tona nuk duhet të preken nga ky proces”, tha ai.

Lidhur me kthimin e fondeve, Gurlek tha se SPK-ja kishte vendosur t’u rimbursonte investitorëve të ligjshëm humbjet deri në 1 milion lira turke.

Ai tha se prokurorët kishin identifikuar persona që dyshohet se kishin realizuar fitime të konsiderueshme përmes transaksioneve manipuluese të kryera në periudha të shkurtra dhe u kishin ngrirë pasuritë, përfshirë pasuritë personale të menaxherëve të portofoleve dhe fondeve.

Ai tha se në Fondin e Sigurimit të Depozitave të Kursimeve (TMSF) është krijuar gjithashtu një mekanizëm që u mundëson njerëzve të kthejnë vullnetarisht paratë.

“Dje fola me drejtuesin e TMSF-së. Pesë persona i kanë kthyer paratë në këto llogari”, tha Gurlek, duke shtuar se pasuritë në fjalë janë transferuar në TMSF në përputhje me ligjin dhe se institucioni do të njoftojë prokurorët pas përfundimit të kthimeve përkatëse.

Gurlek gjithashtu paralajmëroi se personat që kompensojnë humbjet nuk duhet të mendojnë se çështjet e tyre penale do të pushohen automatikisht.

“Kompensimi i dyfishit të shumës së dëmit përbën një arsye për pendim efektiv, por kjo nuk do të thotë se hetimi ose çështja do të mbyllet. Është thjesht një arsye për ulje të dënimit, e parashikuar me ligj. Perceptimi se nuk do të ndërmerret asnjë veprim ndaj atyre që kompensojnë dëmin është i gabuar. Ndaj tyre patjetër do të ndërmerren masa”, tha ai.

Ai tha se autoritetet kanë informacione për individë dhe kompani të dyshuara se kanë realizuar fitime të tepruara dhe se tashmë kanë ndërmarrë hapa për rikuperimin e pasurive dhe fondeve që dyshohet se janë transferuar jashtë vendit.

“Ne kemi nisur procedurat gjyqësore për të rikthyer paratë e dërguara në Zvicër. Kemi sekuestruar pasuritë e tyre personale dhe kemi vendosur masa parandaluese. Gjithashtu kemi vendosur masa mbi regjistrat e pronave. Hetimet vazhdojnë”, tha Gurlek.

Ai premtoi se autoritetet do të vazhdojnë të punojnë për mbrojtjen e të drejtave të investitorëve.

“Ne do të bëjmë gjithçka brenda kornizës së ligjit për të rikthyer, në masën më të plotë të mundshme, paratë e qytetarëve tanë nga ata që kanë realizuar fitime të tepruara në një periudhë të shkurtër ose që kanë hyrë në treg pasi kanë marrë informacione paraprake”, tha ai.

Më tej, Gurlek tha se të gjitha institucionet përkatëse shtetërore po bashkëpunojnë për këtë çështje dhe i bëri thirrje publikut të ruajë besimin në ekonominë dhe tregjet e kapitalit të Türkiyes.

“Le të jenë të qetë. Falë hetimeve që po zhvillohen, tregjet tona, Bursa e Stambollit dhe investitorët tanë nuk do të preken nga ky proces. Nuk ka kthim pas nga procesi Türkiye pa terrorizëm”, tha ai.

- “Nuk ka kthim prapa nga procesi i Türkiyes pa terrorizëm"

Gurlek po ashtu e përshkroi procesin “Türkiye pa terrorizëm” si një prioritet madhor, duke theksuar se nuk do të ketë kthim pas.

“Procesi ‘Türkiyes pa terrorizëm’ është shumë i rëndësishëm për ne. Ne e shohim atë si një projekt të ‘Shekullit të Türkiyes’. Për më shumë se 40 vjet, të rinjtë tanë, fëmijët tanë dhe siguria e shtetit, fatkeqësisht, kanë pësuar dëme në çdo aspekt. Nuk ka kthim pas nga ky proces. Shigjeta tashmë është nisur”, tha ai.

Ai shpjegoi se, sipas dispozitave të ligjit për forcimin e solidaritetit kombëtar dhe integrimit shoqëror, të miratuar nga parlamenti në fillim të këtij viti me 467 vota, ligji nuk mund të hyjë në fuqi derisa grupi terrorist PKK të jetë çmontuar në të gjitha komponentët e tij.

Ai tha se nën drejtimin e zv/presidentit Yilmaz është krijuar një Bord Monitorimi dhe Vlerësimi, ndërsa Ministria e Mbrojtjes, Organizata Kombëtare e Inteligjencës (MIT) dhe Këshilli i Sigurisë Kombëtare po punojnë për të verifikuar nëse grupi është çmontuar vërtet.

“Procesi vazhdon. Në veçanti, ekziston një mekanizëm për përcaktimin dhe konfirmimin e çmontimit të grupit në të gjitha komponentët e tij. Ministria jonë e Mbrojtjes, agjencia jonë e inteligjencës dhe Këshilli ynë i Sigurisë Kombëtare po punojnë për këtë. Procesi po vazhdon. Falë Zotit, deri tani po shkon mirë”, tha Gurlek.

Ai paralajmëroi kundër përpjekjeve për të provokuar procesin, duke theksuar se autoritetet po marrin masa sigurie në stadiume dhe po bashkëpunojnë me Ministrinë e Brendshme.

“Ne nuk do t’u japim mundësi të veprojnë”, tha ai.

Gurlek tha se përfundimi i procesit do t’u mundësonte njerëzve të orientonin energjinë dhe burimet e tyre drejt investimeve dhe stimujve, duke krijuar njëkohësisht mundësi të reja punësimi për të rinjtë.

“Shpresojmë që procesi të përfundojë. Është shumë i rëndësishëm për ne. Ministria e Drejtësisë po e ndjek nga afër këtë proces”, tha ai.