Presidenti amerikan, Donald Trump, nuk ka pranuar ta mbështesë kryeministrin izraelit, Benjamin Netanyahu, për një mandat tjetër në detyrë përpara zgjedhjeve të ardhshme, duke shmangur mbështetjen e drejtpërdrejtë për aleatin e tij të kahershëm, transmeton Anadolu.

“Epo, mund të them vetëm se nuk jam më i përfshirë në politikë, përveç faktit që jemi të popullarizuar”, tha Trump për revistën "Time" kur u pyet nëse Netanyahut duhet t’i jepet mandat tjetër në zgjedhjet e 27 tetorit.

I pyetur sërish për këtë çështje, ai u përgjigj: “Jo, gjëja ime kryesore, dua t’i ndihmoj ata të mbrojnë Izraelin”, duke shmangur një mbështetje të qartë për Netanyahun në intervistën e realizuar të hënën.

Trump theksoi në vend të kësaj popullaritetin e tij personal në mesin e publikut izraelit, duke pretenduar se popullariteti i tij arrin “rreth 99 për qind”, për shkak të politikave të ndjekura në të kaluarën.

I pyetur nëse Uashingtoni mund të bashkëpunonte në mënyrë më efektive me kandidatin e opozitës dhe ish-shefin e ushtrisë, Gadi Eisenkot, Trump tha se nuk kishte “dëgjuar gjëra të këqija për të”, por paralajmëroi kundër nënvlerësimit të Netanyahut.

“Njerëzit e kanë konsideruar të përfunduar karrierën e Bibi-t (Netanyahut) shumë, shumë herë, ashtu siç më kanë konsideruar edhe mua të përfunduar shumë, shumë herë”, tha Trump.

“Nuk do ta nënvlerësoja Bibin”, theksoi ai.

Marrëdhënia e Trumpit me Netanyahun thuhet se është bërë më e tensionuar gjatë muajve të fundit për shkak të luftës në Iran dhe sulmeve të vazhdueshme të Izraelit në Liban dhe Gaza.