Presidenti turk Recep Tayyip Erdoğan vlerësoi të mërkurën solidaritetin mes Türkiyes dhe Palestinës pas një ndeshjeje miqësore futbolli në provincën qendrore turke të Konyas.

“Sonte në Konya, ndeshja miqësore mes Konyasporit dhe Kombëtares së Palestinës ishte një shembull i jashtëzakonshëm i vëllazërisë, solidaritetit dhe unitetit të zemrave mes vendeve tona”, tha Erdoğan në platformën sociale X.

Ai u përcolli “përshëndetjet dhe përzemërsinë më të sinqertë” lojtarëve palestinezë, të cilët udhëtuan drejt Türkiyes për ndeshjen, si dhe popullit palestinez.

Erdoğan falënderoi gjithashtu banorët e Konyas, të cilët mbushën stadiumin me kapacitet prej 42.000 vendesh, mirëpritën Kombëtaren e Palestinës dhe shprehën mbështetjen e tyre për çështjen palestineze.

Ai tha se ndeshja i kujtoi edhe një herë botës “tragjedinë dhe gjenocidin” në Palestinë dhe Gaza.

“Si Türkiye, ne do të vazhdojmë të qëndrojmë të bashkuar dhe në solidaritet me vëllezërit dhe motrat tona palestineze dhe nga Gaza, të mbrojmë të drejtat e tyre në arenën ndërkombëtare dhe të shfaqim solidaritetin tonë me ta në mënyrën më të fuqishme të mundshme”, shtoi presidenti turk.

Ndeshja miqësore Palestinë-Konyaspor

Konyaspori dhe Kombëtarja e Palestinës u përballën të mërkurën në një ndeshje miqësore në qytetin turk të Konyas, në kuadër të aktiviteteve të “Ditës së Palestinës”.

Gjatë aktiviteteve, të zhvilluara për të tërhequr vëmendjen ndaj fëmijëve që kanë humbur jetën në Palestinë, u shënuan momente emocionuese.

Konyaspori kaloi në avantazh në minutën e dytë përmes Melih Ibrahimoglut, por Kombëtarja e Palestinës përmbysi rezultatin dhe kaloi në epërsi 2-1 me dy golat e Mohammed Sandouqa në minutat 12 dhe 25. Mostafa Mohamed i Konyasporit barazoi në minutën e 28-të, duke e mbyllur pjesën e parë me rezultatin 2-2.

Pavarësisht sulmeve nga të dyja skuadrat në pjesën e dytë, nuk pati gola të tjerë dhe ndeshja përfundoi 2-2.