Presidenti amerikan Donald Trump i vendosi të dielën një ultimatum të ashpër Teheranit, duke ngritur pyetjen nëse Uashingtoni duhet të finalizojë një marrëveshje diplomatike apo të synojë shkatërrimin e plotë ushtarak të Iranit.

“A duhet të arrij një marrëveshje me ta, apo t'i shkatërroj përfundimisht? Kjo është pyetja e vetme”, deklaroi Trump për Fox News, duke i paraqitur veprimet e ardhshme si një zgjedhje mes diplomacisë dhe përshkallëzimit të operacioneve ushtarake.

Duke pretenduar se forcat amerikane kanë kontroll të plotë detar mbi korridorin e transportit në Gjirin Persik, Trump tha: “Mos harroni, ne tani e kontrollojmë Ngushticën e Hormuzit. Ata nuk marrin asgjë. Po, ne marrim gjithçka”.

Ai këmbënguli se aktiviteti tregtar përmes kësaj ngushtice strategjike e tejkalon nivelin e para luftës, duke e cilësuar si “të pabesueshme” mënyrën se si Marina amerikane po zbaton bllokadën ndaj porteve dhe transportit detar iranian.

Të shtunën, Trump sugjeroi se Uashingtoni mund të ndërmarrë sulme të reja ushtarake ose të sigurojë një marrëveshje gjithëpërfshirëse, duke vënë në dyshim nëse Teherani do t'i respektonte angazhimet e mundshme, ndërsa këmbënguli se të dyja rezultatet do të përbënin fitore për ShBA-në.

Kontrolli mbi Ngushticën e Hormuzit mbetet një nga çështjet kryesore të mosmarrëveshjeve në luftën me Iranin, e cila shpërtheu në fund të shkurtit pas sulmeve të përbashkëta të ShBA-së dhe Izraelit, pavarësisht armëpushimit dhe një memorandumi mirëkuptimi për arritjen e një marrëveshjeje përfundimtare paqeje.