Триесет и првата конференција на земјите потписнички на Рамковната конвенција на Обединетите нации за климатски промени (COP31) започнува во понеделник во Анталија, туристички град на брегот на Средоземното Море во Туркије. На конференцијата ќе учествуваат шефови на држави, високи претставници, академици и претставници на граѓанското општество од целиот свет.
Првпат одржан во Берлин во 1995 година, овој годишен самит им овозможува на земјите потписнички на конвенцијата да го оценат напредокот во борбата против климатските промени, да развиваат заеднички решенија и да донесуваат одлуки што ги обликуваат глобалните климатски политики.
Туркије ќе претседава со овогодишната конференција, која ќе се одржи од 9 до 20 ноември и на која ќе се разгледуваат клучни одлуки за одржливиот развој и климатските политики.
За COP31 во Анталија е подготвен простор со површина од 1,1 милион квадратни метри, а конференцијата ќе се одржи под мотото „COP на иднината – COP на спроведувањето“, засновано врз три столба: дијалог, консензус и дејствување.
Целта на конференцијата е зајакнување на довербата и соработката меѓу земјите, промовирање на заедничката одговорност и претворање на климатските обврски во конкретни и мерливи активности.
Активностите ќе се одвиваат во две посебно определени зони – Сината и Зелената зона.
Сината зона наменета за состаноци на високо ниво
Официјалните преговори во рамките на Рамковната конвенција на Обединетите нации за климатски промени, состаноците на високо ниво и дипломатските разговори ќе се одржуваат во Сината зона, до која пристапот ќе биде контролиран во согласност со правилата за акредитација на ОН.
Во оваа зона ќе бидат организирани и придружни настани, вклучително и панел-дискусии за приспособување кон климатските промени, чиста енергија, нула отпад, одржливи градови, климатско финансирање, технологија, здравство и зелена трансформација.
Сината зона опфаќа пленарна сала, канцеларии на делегациите, павилјони, прес-центар и ресторани.
Објектот со пет ливчиња, наречен „Временски тунел“, со површина од 10.000 квадратни метри, ќе се користи како Музеј на нула отпад.
Зелената зона ќе биде домаќин на тематски центри
Зелената зона, осмислена за поттикнување на учеството на јавноста, ќе опфаќа тематски центри во кои владините институции, компаниите, академиците, организациите на граѓанското општество и младите ќе можат да разменуваат климатски решенија, технологии и примери на добри практики преку изложби, концерти, панел-дискусии, работилници и интерактивни активности.
Во овој простор ќе се наоѓаат Павилјонот на Туркије, Научниот центар, Зелената индустријализација, Отпорните градови, Енергијата и транспортот, Културата и цивилизацијата, COPArt и Зоната за стартап-компании.
Во рамките на Движењето за нула отпад, кое се прошири низ целиот свет, на локацијата на COP31 ќе бидат организирани Центар за нула отпад, Центар за практична примена и работилници за нула отпад, Кујна за нула отпад „Седум региони, седум домови“, Музеј на нула отпад и Центар за привремено складирање и компостирање отпад.
Зелената зона ќе ја опфаќа и „Анталиската куќа“, која ја претставува традиционалната култура на Јуруците, како и павилјон за желки изграден од материјали што не создаваат отпад.
Конференциските сали именувани по културни и историски знаменитости
Салите за состаноци и конференциските сали во комплексот COP31 ги добија имињата по знаменитости, историски личности и културни елементи што го претставуваат наследството на Анадолија и турско-исламската цивилизација.
Најголемата пленарна сала во Сината зона, со капацитет од 1.794 лица, е наречена „Анадолија“. Во неа ќе се одржуваат состаноци на претставниците на државите и владите, како и официјалните преговори.
Втората пленарна сала, со капацитет од 828 лица, е наречена „Акдениз“, а во оваа зона се наоѓа и „Анталиската сала“.
Една од двете сали за прес-конференции е именувана по меѓународно познатиот суфиски учител и поет Мевлана Џелаледин Руми, додека другата го носи името на турскиот поет и мистик Јунус Емре.
Останатите сали за состаноци во Сината зона се именувани Селимије, Евлија Челебија, Ајдер, Ѓобеклитепе, Топкапи, Качкар, Зеугма, Кападокија, Босфор, Патара, Сумела, Сезаи Каракоч, Пири Реис, Харпут, Мимар Синан, планината Агри, езерото Ван, Троја, Фетије, Памуккале, Ефес, Галиполе, Ахлат, Улудаг, Чаталхојук и Аспендос.
Просториите за придружни настани ги носат имињата Узунѓол, Ликија, Асос, Перге, Ахи Евран, Ашик Вејсел и Хатуша.
Во Сината зона ќе биде поставена и тропска градина на пеперутки, која на посетителите ќе им понуди интерактивно искуство насочено кон природата, екосистемите и биодиверзитетот.
Во Зелената зона, најголемата сала, со капацитет од 5.000 лица, е наречена „Сала Газа“.
Останатите сали и простории за состаноци се именувани по истакнати историски и културни личности, меѓу кои се Ибн Сина, добитникот на Нобеловата награда Азиз Санџар, Ал-Фараби, Мехмет Акиф Ерсој, Хаџи Бекташ Вели, Џаџабеј, Ахмед Јесеви, Афет Инан, Фатма Алије, Ал-Бируни и Осман Хамди Беј.
„Анадолската градина“ во Зелената зона ќе го претстави цивилизациското наследство на регионот – од Хетитите, Фригијците, Лидијците и Ликијците до римскиот, византискиот, селџучкиот и османлискиот период, со акцент на складот со природата, гостопримството и одржливиот начин на живот.
Во рамките на концептот „Седум региони, седум кујни“, COP31 на посетителите ќе им го претстави и кулинарското наследство на Анадолија, локалните специјалитети и одржливата култура на исхрана.
Посетителите ќе можат да се запознаат со медитеранската, газиантепската, кајсериската, кујната за нула отпад, кујната на турскиот свет, коњската и црноморската кујна.
На располагање 630 еколошки автобуси
Во Зелената зона е формиран центар за управување со кризни ситуации, под координација на Канцеларијата на гувернерот на Анталија.
Во центарот ќе бидат присутни претставници на покраинските полициски и здравствени управи, Дирекцијата за управување со катастрофи и вонредни состојби, противпожарната служба, Управата за водовод и канализација на Анталија, Општина Аксу, дистрибутерот на електрична енергија АКЕДАШ и дистрибутерот на природен гас ЕНЕРЈА.
За да се обезбеди брз и ефикасен пристап до здравствена заштита, во комплексот ќе функционираат пет медицински пунктови, од кои три во Сината и два во Зелената зона.
Планирано е ангажирање и на седум активни и две резервни амбулантни возила, а капацитетите за итни интервенции дополнително ќе бидат зајакнати со 20 мобилни тимови на Националната медицинска спасувачка служба, од кои девет ќе бидат распоредени во Сината, а 11 во Зелената зона.
Во рамките на безбедносните мерки ќе бидат ангажирани вкупно 27.957 припадници на полицијата, жандармеријата и крајбрежната стража.
За превоз на учесниците на конференцијата ќе бидат на располагање 630 автобуси со ниско ниво на емисија на штетни гасови, обезбедени од 25 општини.
