Европската комисија (ЕК) реагираше на неодамнешните протести во Албанија, нагласувајќи дека ја осудува употребата на насилство и дека секој треба да сноси одговорност преку соодветна правна постапка.

„Ја осудуваме употребата на насилство во Тирана и во другите градови во Албанија, вклучително и подметнување пожари, напади врз државни институции и уништување на јавен и приватен имот. Насилството нема место во демократското општество, а одговорот на него мора секогаш да биде во согласност со законот и пропорционален“, се вели во соопштението.

Понатаму се наведува дека слободата на собирање и слободата на изразување се основни права и клучни европски вредности, „кои мора да се почитуваат и остваруваат на мирен начин“.

„Ја поздравуваме посветеноста на албанските власти да го гарантираат правото на протест. Во земја-кандидат, која е цврсто посветена на процесот на пристапување кон ЕУ и постигнува значителен напредок на својот европски пат, загриженостите треба да се решаваат преку конструктивен дијалог и на мирен начин“, се нагласува во соопштението.

Протестите на Студентите во Албанија со поддршка на дел од граѓаните беа проследени со тензии и судири меѓу демонстрантите и полициските сили, како и со акти на насилство и оштетување на јавниот имот и институциите.

Демонстрантите наведуваат дека прашањата што ги покренуваат се однесуваат на студентските потреби кои останале нерешени во последните години; притоа, нивните барања се проширија и опфатија и други прашања. Некои студенти бараат оставка од премиерот Еди Рама.

Студентите тврдат дека се соочуваат со лоши услови во образованието, недоволни инвестиции, високи трошоци за кирија и недостиг на студентско сместување.

Студентите најавија дека протестите ќе продолжат и во наредните денови.