Односите меѓу Хрватска и Кина се во нагорна линија, но сепак постои простор за дополнително подобрување, се согласија министрите за надворешни работи на двете земји, Гордан Грлиќ Радман и Ванг Ји.

Ова е прва официјална посета на Хрватска од страна на еден кинески шеф на дипломатијата на ова ниво во последните 33 години. Последната таква посета ја оствари тогашниот кинески министер за надворешни работи, Ќен Ќичен.

Ванг Ји истакна дека изминатиот период сведочи за позитивниот развој на билатералните односи, напоменувајќи дека посетите на министрите за надворешни работи често се организираат за решавање на конфликти или несогласувања.

„Тоа значи дека немаме отворени билатерални прашања. Одржуваме добар замав, па затоа нема потреба од постојана размена на посети меѓу министрите за надворешни работи“, рече Ванг.

Грлиќ Радман се заложи за подигнување на соработката меѓу двете земји на ново ниво, како и за проширување на опсегот на заеднички активности.

Тој нагласи дека Хрватска има за цел да привлече кинески инвестиции и да го намали трговскиот дефицит, истакнувајќи ја отвореноста кон кинеските компании и инвеститори – особено во секторите транспорт и логистика, обновливи извори на енергија, како и во автомобилската и поморската индустрија.

Разговорите меѓу министрите и нивните делегации беа фокусирани на зајакнување на економската и трговската соработка, како и на разгледување на актуелните меѓународни и надворешнополитички прашања, се наведува во соопштението од хрватското Министерство за надворешни и европски работи.

Посебно внимание беше посветено на можностите што ги нуди неодамна воспоставената авионска линија Пекинг – Букурешт – Загреб. Линијата беше пуштена во сообраќај на 4 септември и оперира секој понеделник, среда и петок во текот на целата година. Станува збор за прва редовна патничка авионска врска меѓу Хрватска и Кина, за која се очекува да го поттикне туристичкиот промет и да отвори нови деловни можности.

Според податоците на Хрватската стопанска комора, Кина била 11-тиот најважен трговски партнер на Хрватска, со удел од 2,41 отсто во вкупната трговска размена на земјата. Хрватска на кинескиот пазар најмногу извезува производи од дрво, мермер и машини за преработка на гума и пластика. Грлиќ Радман ја посети Кина во јули минатата година, при што ја истакна важноста од подобар пристап до кинескиот пазар за хрватските компании, како и зголемување на извозот на хрватски производи.

Кинескиот премиер Ли Кечијанг ги посети Загреб и Дубровник во 2019 година, кога Дубровник беше домаќин на самитот во форматот „16+1“, кој ги обедини Кина и земјите од Централна и Источна Европа. При таа посета, Хрватска и Кина потпишаа десет меѓудржавни договори и меморандуми. Во 2009 година, Хрватска ја посети и тогашниот кинески претседател Ху Џинтао.

За време на престојот во Загреб, Ванг Ји ќе се сретне и со хрватскиот претседател Зоран Милановиќ и со премиерот Андреј Пленковиќ.

Ванг, член на Политбирото на Централниот комитет на Комунистичката партија на Кина, ја предводи кинеската дипломатија повеќе од 13 години, со краток прекин. Хрватска е една од станиците на неговата регионална турнеја, во рамките на која го посети Азербејџан, а планирани се и посети на Црна Гора и Бугарија.