Ministria e Jashtme e Izraelit thirri sot të Ngarkuarën me Punë të Spanjës në Tel-Aviv, Francisca Pedros, për t'i dhënë vërejtje lidhur me deklaratat e ministres spanjolle të Rinisë, Sira Rego, në mbështetje të një shteti palestinez "nga lumi në det".
Hapi u ndërmor pasi Rego tha se publiku spanjoll mbështet krijimin e një shteti palestinez "nga lumi në det". Ministria e Jashtme izraelite tha se deklaratat janë pjesë e "politikës sistematike anti-Izrael" të qeverisë spanjolle nën kryeministrin Pedro Sanchez, raporton gazeta "Yedioth Ahronoth".
Qeveria spanjolle nuk ka dhënë menjëherë komente lidhur me veprimin e Izraelit. Rego i bëri deklaratat të enjten, gjatë prezantimit të ambasadorit palestinez në Spanjë, Fadi Elhusseini, në një aktivitet në Madrid, sipas mediave spanjolle.
Ajo tha se "Spanja ka mbajtur qëndrimin e duhur ndaj konfliktit në Lindjen e Mesme dhe se publiku spanjoll mbështet një Palestinë të lirë nga lumi në det".
"Ne nuk zgjodhëm anën e gabuar. Të ngrihemi për të drejtat e njeriut dhe të qëndrojmë përkrah popullit palestinez është një burim krenarie e thellë për ne", shtoi ajo.
Ajo akuzoi kryeministrin izraelit Benjamin Netanyahu se është "kriminel lufte" dhe dënoi gjenocidin e Izraelit në Rripin e Gazës. Marrëdhëniet mes Spanjës dhe Izraelit janë tensionuar për shkak të dënimit nga Madridi të luftës izraelite në Gaza. Spanja e njohu zyrtarisht shtetin e Palestinës në maj 2024.
Në prill 2026, ministri i Jashtëm spanjoll, Jose Manuel Albares, i bëri thirrje BE-së të marrë masa më të forta ndaj Izraelit, përfshirë rishqyrtimin e marrëdhënieve me Tel Avivin, duke pyetur se çfarë tjetër duhej të ndodhte përpara se blloku të reagonte ndaj shkeljeve të së drejtës ndërkombëtare dhe të drejtave të njeriut nga Izraeli.
Më shumë se 74 mijë palestinezë janë vrarë dhe mbi 175 mijë të tjerë janë plagosur në luftën gjenocidale të Izraelit në Gaza që nga viti 2023. Ofensiva ka shkatërruar rreth 90 për qind të infrastrukturës së enklavës.
Pavarësisht armëpushimit që hyri në fuqi më 10 tetor 2025, ushtria izraelite ka vazhduar sulmet e përditshme në Gaza, duke vrarë mbi 1.400 palestinezë dhe duke plagosur rreth 5.000 të tjerë, sipas Ministrisë së Shëndetësisë së Gazës.
