Kryeministri izraelit Benjamin Netanyahu është takuar në fshehtësi me presidentin e Emirateve të Bashkuara Arabe (EBA), Sheikh Mohamed bin Zayed Al Nahyan, në Abu Dhabi, raportuan të dielën mediat izraelite.
EBA-ja nuk komentoi menjëherë pretendimin.
Kanali izraelit Channel 12 raportoi se Netanyahu udhëtoi drejt kryeqytetit të Emirateve me një avion privat, ku u takua me Sheikh Mohamed dhe kaloi ditën.
Transmetuesi publik izraelit KAN tha se zyra e Netanyahut nuk e kishte njoftuar vizitën. Sipas tij, udhëtimi erdhi në një kohë debatesh pas një sërë raportimesh mediatike lidhur me paralajmërimet e inteligjencës që Netanyahu dyshohet se kishte marrë përpara sulmit të Hamasit ndaj Izraelit më 7 tetor 2023.
Të premten, The New York Times raportoi se Netanyahu kishte marrë një paralajmërim konfidencial nga presidenti i Emirateve përpara sulmit të Hamasit, por nuk ua kishte përcjellë atë drejtuesve të sigurisë izraelite.
KAN raportoi se Netanyahu udhëtoi me një avion privat në pronësi të një biznesmeni izraelit, emri i të cilit nuk u bë publik, dhe që përdoret nga figura të larta izraelite për udhëtime ndërkombëtare.
Sipas transmetuesit, avioni u nis nga Aeroporti Ben Gurion pasdite dhe mbërriti në Abu Dhabi në orën 15:10 (11:10 GMT). Ai u nis drejt Izraelit në orën 19:10 (15:10 GMT), katër orë më vonë, dhe u ul pak pas orës 22:00 (19:00 GMT).
KAN tha se Netanyahu e kishte përdorur të njëjtin avion edhe për një udhëtim në Abu Dhabi gjatë luftës me Iranin.
Gazeta me bazë në Abu Dhabi The National citoi një burim zyrtar të paidentifikuar nga Emiratet, sipas të cilit vendi diskuton çështjet e sigurisë me shtetet e tjera përmes agjencive përkatëse, “jo në nivelin e udhëheqësve kombëtarë”.
Netanyahu drejton qeverinë aktuale izraelite që nga fundi i vitit 2022. Në vitin 2024, Gjykata Penale Ndërkombëtare (GjPN) lëshoi urdhër-arreste ndaj tij dhe ish-ministrit izraelit të Mbrojtjes, Yoav Gallant, lidhur me krime të dyshuara lufte në Gaza.
Që nga 8 tetori 2023, lufta e Izraelit në Gaza ka vrarë më shumë se 74 mijë palestinezë dhe ka plagosur mbi 175 mijë të tjerë, shumica gra dhe fëmijë, ndërsa rreth 90 për qind e infrastrukturës së territorit është dëmtuar.
