Restaurimi i pyjeve dhe peizazheve të degraduara mund të rrisë rendimentin global të të korrave dhe të forcojë sigurinë ushqimore, ndërsa shtohet presioni mbi tokën dhe burimet natyrore, bëri të ditur të hënën Organizata e OKB-së për Ushqimin dhe Bujqësinë (FAO).

Në raportin e saj “Gjendja e Pyjeve të Botës 2026”, FAO tha se restaurimi mund ta përmirësojë kapacitetin prodhues të zonave bujqësore, ndërsa tokat më të shëndetshme parashikohet të rrisin rendimentin mesatar global të të korrave me rreth 2 për qind deri në vitin 2050.

Sipas raportit, rritja mund të arrijë në 10 për qind në Lindjen e Afërt dhe Afrikën e Veriut dhe në 5 për qind si në Afrikën Sub-Sahariane, ashtu edhe në Amerikën Qendrore dhe Jugore.

FAO tha se përmirësime të tilla mund të kontribuojnë në furnizime më të qëndrueshme me ushqim dhe në uljen e cenueshmërisë ndaj krizave, veçanërisht në vendet ku bujqësia përbën një burim të rëndësishëm të ardhurash.

Gati një e treta e popullsisë së botës varet nga pyjet dhe pemët për sigurinë ushqimore dhe jetesën, ndërsa pyjet mbulojnë 4,14 miliardë hektarë, ose rreth 32 për qind të sipërfaqes tokësore të planetit.

Megjithatë, vlerësohet se 489 milionë hektarë pyje janë humbur si pasojë e shpyllëzimit midis viteve 1990 dhe 2025, ndërsa 1,56 miliardë hektarë tokë janë të degraduar në nivel global, përfshirë 460 milionë hektarë tokë pyjore.

FAO paralajmëroi se mosrestaurimi i ekosistemeve të degraduara sjell një kosto vjetore të vlerësuar nga 878 miliardë deri në 6,3 trilionë dollarë.

Në të kundërt, restaurimi i më shumë se një miliard hektarëve tokë të degraduar mund të gjenerojë përfitime prej 1,8 trilionë dollarësh në vit. Në kushte të favorshme, për çdo dollar të investuar në restaurim mund të sigurohen deri në 30 dollarë përfitime.

“Raporti e bën të qartë se restaurimi i pyjeve dhe peizazheve është më shumë se një prioritet mjedisor, ai është një investim strategjik në sisteme agro-ushqimore më të qëndrueshme dhe në zhvillimin rural”, tha Drejtori i Përgjithshëm i FAO-s, Qu Dongyu.