Finlanda do të shpërndajë rreth 3,5 milionë kopje të shtypura të një udhëzuesi për përgatitjen ndaj emergjencave për familjet dhe bizneset në të gjithë vendin, raportoi sot transmetuesi "Yle".

Udhëzuesi pritet të shpjegojë se si duhet të përgatiten qytetarët për ndërprerje të shërbimeve dhe situata krize, duke trajtuar gjithashtu kërcënimin aktual nga dronët.

"Nuk mjafton që udhëzimet për përgatitjen ndaj ndërprerjeve dhe krizave të jenë të disponueshme për publikun vetëm përmes shërbimit online Suomi.fi”, tha Ira Pasi, menaxhere e projektit në Ministrinë e Brendshme.

Sipas raportimeve, udhëzuesi do të përmbajë përmbledhje të shkurtër dhe jo një paketë të plotë informacioni, duke përmbledhur këshillat kryesore nga autoritete dhe organizata të ndryshme.

Përgatitja dhe shpërndarja e tij pritet të kushtojnë rreth 2 milionë euro.