Bisedimet e drejtpërdrejta mes Iranit dhe Shteteve të Bashkuara në Pakistan përfunduan pa marrëveshje pas rreth 21 orësh negociatash, raportuan mediat iraniane herët të dielën.

Agjencia gjysmë-zyrtare iraniane e lajmeve, Tasnim, tha se bisedimet në Islamabad dështuan për shkak të “kërkesave të tepruara të ShBA-së”, të cilat penguan arritjen e një kuadri të përbashkët mes palëve.

Sipas saj, delegacioni iranian paraqiti vazhdimisht iniciativa dhe propozime të reja në përpjekje për të çuar negociatat drejt një kuadri të përbashkët, por “qëndrimi amerikan i kërkesave të tepruara” pengoi përparimin.

Agjencia shtoi se Pakistani bëri përpjekje që nga orët e para të së dielës për të organizuar një raund tjetër bisedimesh dhe për të shkëmbyer draft-tekste, por negociatat përfunduan pa rezultat.

Teherani refuzoi kërkesat e ShBA-së lidhur me Ngushticën e Hormuzit, programin bërthamor paqësor të Iranit dhe largimin e materialeve bërthamore nga vendi, raportoi agjencia gjysmë-zyrtare Fars.

Sipas saj, Uashingtoni po përpiqej përmes negociatave të arrinte atë që “nuk arriti ta siguronte me luftë”.

Agjencia raportoi gjithashtu se delegacioni amerikan dukej se kërkonte një pretekst për t’u larguar nga tryeza e negociatave dhe nuk ishte i gatshëm të ulte kërkesat e tij, pavarësisht bllokimit të arritur gjatë luftës me Iranin.

Asnjë datë apo vend nuk është shpallur për një raund të ri negociatash.

Bisedimet në Islamabad u konsideruan si negociatat më të rëndësishme të drejtpërdrejta mes Iranit dhe ShBA-së që nga viti 1979, dhe u zhvilluan në një kohë të një armëpushimi të brishtë dyjavor të shpallur më herët këtë javë.