Претседателката на Мексико соопшти дека е поведена истрага за видеоснимка што кружи на социјалните мрежи, на која се гледаат двајца вооружени мажи кои тврдат дека се членови на нарко-картелите од Халиско и Синалоа, а се дел од странските воени легии распоредени во Украина.

Клаудија Шејнбаум рече дека се проверува автентичноста на снимката и се истражува дали членови на картели биле регрутирани од приватни платенички компании или странски влади за да учествуваат во војната меѓу Русија и Украина.

„Го разгледуваме случајот, прво за да утврдиме дали снимката е автентична, а потоа да дознаеме како овие лица се нашле на тоа место“, рече таа.

Кратката видеоснимка, која оваа недела се појави на социјалните мрежи, прикажува двајца вооружени мажи во воена опрема кои се претставуваат како членови на Картел Халиско нова генерација (КХНГ) и Ла Чаписа, фракција на картелот Синалоа.

На снимката, која трае помалку од 30 секунди, мажите извикуваат „Ла Чаписа“ и „КХНГ“, како и „Слава на Украина“

Според Шејнбаум, снимката била презентирана на состанок на Кабинетот за безбедност на Мексико, федерално тело составено од претставници на вооружените сили, морнарицата и безбедносните агенции на земјата.

Таа рече дека, доколку снимката е автентична, „властите ќе се обидат да утврдат како Мексиканци, во овој случај лица што можеби ѝ припаѓаат на криминална група, се вклучиле во вооружен конфликт што се води во Европа“.

Ова е првпат мексиканската Влада јавно да се осврне на гласовите дека мексикански државјани поврзани со организираниот криминал учествуваат како платеници во Украина. Сепак, од почетокот на војната во Европа во 2022 година, мексиканските разузнавачки агенции со загриженост ја следат активноста на платеници поврзани со наркокартели.

Според извештај од 2025 година на францускиот медиум „Интелиџенс онлајн“, Службата за безбедност на Украина (СБУ), на барање на Мексико, започнала истрага за лица осомничени дека се вклучиле како доброволци во Меѓународната легија за одбрана на Украина, со цел да стекнат напредно искуство во војување со беспилотни летала, поврзано со мексиканските наркокартели.