Американскиот министер за одбрана Пит Хегсет вчера изјави дека поранешниот мајор на американската армија, осуден за нападот со огнено оружје во Форт Худ во 2009 година, ќе биде јавно погубен со стрелачки вод на 3 декември.

Хегсет рече дека Нидал Хасан, кој беше осуден на смрт за убиството на 13 лица и повредување на уште 32, ќе биде погубен од војници со пушки во Форт Худ, Тексас.

„Нема дилема- егзекуција со стрелачки вод. Армиски мајор ја предава својата земја. Радикален исламист убива куп Американци во Форт Худ“, рече Хегсет во интервју за „Рил Америкас Војс“, одговарајќи на прашање за одлуката.

„Се разбира, ќе го направиме тоа во Форт Худ. Ќе биде во четврток. Ќе го направиме тоа во 13 часот, во времето кога тој го изврши нападот, а егзекуцијата ќе ја спроведе стрелачки вод составен од војници со пушки“, рече тој.

Хегсет рече дека американската војска нема извршено ваква егзекуција од Втората светска војна.

Пентагон во понеделникот соопшти дека претседателот Доналд Трамп ја одобрил Хегсетовата препорака Хасан да биде погубен со стрелачки вод, оставајќи му на армијата да ги одреди времето и местото.

Армијата претходно немаше објавено датум или локација.

Хасан, поранешен психијатар во американската армија, отвори оган во Форт Худ на 5 ноември 2009 година, при што уби 13 лица и повреди 32.

Во 2013 година беше прогласен за виновен по 13 точки од обвинението за убиство со умисла и 32 точки за обид за убиство и беше осуден на смрт.

Оттогаш е затворен во Форт Левенворт, Канзас.