Францускиот премиер Себастијан Лекорну во четврток објави дека повеќе од 3.000 наставници ќе бидат распоредени во училиштата кои се соочуваат со недостиг, што е прв одговор на барањата на средношколците кои протестираат речиси две недели.

Лекорну го објави ова откако 71.500 луѓе учествуваа во нов бран протести низ цела Франција, барајќи подобри услови во училиштата.

Демонстрациите беа пропратени со стотици апсења и напади врз образовните институции и полицијата.

Лекорну рече дека според планот што го осмисли министерот за образование Едуар Жефри, заменските наставници ќе почнат да работат во 114 средни училишта каде што недостигот е најголем.

Жефри изјави за телевизијата TФ1 дека се очекува наставниците да пристигнат помеѓу петок и следниот вторник.

Премиерот, исто така, објави планови за испраќање на неколку стотици дополнителни вработени за да помогнат во училиштата.

По есенските празници, училиштата ќе можат подобро да ги користат наставниците за да ги покријат оние на краткорочни отсуства, рече тој.

Лекорну, исто така, вети дополнителни средства, велејќи дека владата ќе поднесе измени во буџетот за 2027 година за да ги претвори некои од предлозите на учениците во конкретни мерки, особено за заменските наставници.

Објавата е првиот конкретен одговор на владата на барањата на учениците кои протестираат за повеќе наставници и зголемени инвестиции во образованието.

Универзитетските студенти оттогаш им се придружија и на демонстрантите, а најавени се и повеќе протести за наредните денови.

Француските тинејџери продолжуваат со блокадите на училиштата

Протестното движење, кое сега е во третата недела, откри длабоки тензии во Франција околу јавните барања за инвестиции во запоставени јавни услуги и празниот буџет на владата под притисок од пазарите на обврзници да го намали долгот и дефицитот.

Бранот протести доведе до стотици апсења, десетици повреди и жестока дебата за употребата на сила од страна на интервентната полиција против тинејџерите.

Владата ја суспендираше употребата на шок бомби за време на протестите во среда.

Министерството за образование соопшти дека 224 средни училишта биле затворени во четврток наутро, а 151 училиште биле делумно повторно отворени по блокадите. Бројот на затворени училишта е намален за 30 проценти во однос на среда наутро, при што 94 проценти од средните училишта се целосно или делумно отворени.

Преносите во живо на телевизиските канали покажаа дека протестите продолжиле во Нант, Рен, Брон, Тулон и Марсеј во четврток, два дена откако стотици илјади демонстранти излегоа на улиците низ целата земја.

Според анкетата на агенцијата Елабе за БФM TВ, 72% од Французите ги сметаат барањата на студентите за легитимни, но 55% веруваат дека протестите треба да се прекинат.

Студентски протести, пак, се одржаа и во Белгија пред некои училишта во Брисел и пред Универзитетот во Лиеж, објави телевизијата РТБФ.

Во Лиеж, каде што локалните медиуми објавија повеќе од сто апсења поврзани со студентските протести овој месец, властите воведоа забрана за јавни собири на повеќе од три лица до 16 октомври.

Белгискиот министер за надворешни работи, Бернар Квинтин, изјави дека крајнолевичарски активисти се инфилтрирале меѓу демонстрантите во училиштата во Лиеж и предизвикувале материјална штета.

Жулиен Доеш, член на Антифашистичкиот фронт во Лиеж, изјави дека тврдењата на Квинтин се „измислици“.