Не се утврдени елементи на кривично дело за неовластен пристап до компјутерскиот систем во Кабинетот на Претседателката на државата Гордана Силјановска- Давкова, соопшти Основното јавно обвинителство за гонење на организиран криминал и корупција.

„По спроведена предистражна постапка во однос на наводите од поднесената кривична пријава со сомненија за неовластен пристап до компјутерскиот систем во Кабинетот на Претседателката на Република Северна Македонија и неовластено прибирање податоци, предметниот јавен обвинител од Основното јавно обвинителство за гонење на организиран криминал и корупција донесе Резолуција со која оцени дека нема основ за натамошно јавнообвинителско постапување.

Според ОЈОГОКК во текот на постапката, со наредба од Основниот кривичен суд била обезбедена компјутерска опрема врз која се извршени информатичко-форензички анализи.

Били анализирани и податоци од мобилни уреди и биле прибрани и известувања од лица запознаени со настанот.

„Според извештаите на Секторот за компјутерски криминал при МВР, не се утврдени дигитални траги или други форензички показатели за неовластено навлегување во компјутерскиот систем, ниту се пронајдени докази за снимање и прибирање класифицирани податоци. При анализите се констатирани одредени безбедносни и административни слабости во конфигурацијата на системот, кои можеле да претставуваат потенцијален безбедносен ризик, но не биле утврдени дигитални докази за извршување на пријавените кривични дела“, соопшти ОЈОГООК.

Според обвинителството, по оценка на сите прибрани докази, надлежниот јавен обвинител утврди дека не се исполнети законските обележја на кривичните дела „Оддавање државна тајна“ од член 317 и „Оштетување и неовластено навлегување во компјутерски систем“ од член 251 од Кривичниот законик, ниту пак на друго кривично дело кое се гони по службена должност.

Индициите и сомнежите за наводната шпионажа во кабинетот на претседателката преку анонимна кривична пријава му беа доставени на Обвинителството.