Калиграфот Фераџ Аршин, кој живее во главниот град на Сирија, Дамаск, веќе 41 година ја одржува традицијата на калиграфијата.

Аршин работи во подрумот на една зграда во историската населба Рукнедин во Дамаск, а со арапска калиграфија професионално се занимава веќе 41 година. Тој уште во детството се заинтересирал за оваа уметност.

Денес, покрај создавањето дела во различни калиграфски стилови, Аршин преку подучување на младите придонесува за зачувување и пренесување на калиграфската уметност на идните генерации.

Во текот на својата уметничка кариера, Аршин постигнал значајни успеси на национални и меѓународни натпревари. Во 2001 и 2004 година ја претставувал Сирија на манифестации организирани од Центарот за истражување и проучување при Организацијата за исламска соработка.

Аршин освоил трето место на натпреварот во арапска калиграфија во Саудиска Арабија, а пред три години освоил прво место на натпреварот во Обединетите Арапски Емирати.

Во разговор за АА, Аршин вели дека професионално почнал да се занимава со арапска калиграфија во 1980 година и дека во текот на целиот живот, освен како калиграф, работел и како учител.

„На почетокот ја изучував калиграфијата преку набљудување, книги и статии и следејќи телевизиски емисии. Секогаш се трудев да ја изучувам и да ја пренесувам оваа бесмртна уметност“, истакнува тој.

Аршин раскажа дека во 2016 година бил награден со плакета за признание од Универзитетот во Дамаск, а искуството од подучувањето на студентите го опиша како исклучително пријатно.

Тој посочува дека со развојот на технологијата луѓето сè повеќе се оддалечуваат од ракописот и се насочуваат кон компјутерски дизајни, а за влијанието на дигитализацијата врз калиграфијата Аршин вели:

„Компјутерот може да создаде дело, но тоа дело нема душа. Кога калиграфот пишува со својата рака, во буквите и во целото дело се чувствува душа.“

Аршин посочи дека низ историјата Дамаск бил дом на голем број уметници и калиграфи, додавајќи дека арапската калиграфија оставила трага низ градот, особено во украсите на историските градби.

Тој истакна дека арапската калиграфија, која се среќава во украсите на Дамаск, градот што ги носи трагите на различни цивилизации, им дава естетика и елеганција на историските градби.

Нагласувајќи дека калиграфијата е важен дел не само од арапската и исламската цивилизација, туку и од сириската култура, Аршин истакна: „Преку нашата работа во областа на арапската калиграфија го зачувуваме културното наследство на нашата земја.“

Истакнувајќи дека во секој момент од денот ги има подготвено пенкалото и приборот за работа, Аршин изрази задоволство што се зголемува интересот на младите за калиграфијата.